Британия Пекиндаги Олимпиада ўйинларини дипломатик бойкот қилиши мумкин

Буюк Британия бош вазири Борис Жонсон Хитойнинг инсон ҳуқуқлари соҳасидаги ҳаракатларига норозилик белгиси сифатида Пекинда бўлиб ўтадиган қишки Олимпиада ўйинларини дипломатик бойкот қилиш имкониятини кўриб чиқмоқда. Бу ҳақда The Times газетаси хабар берди.

Газетанинг ёзишича, ҳукуматда Буюк Британия ҳам Олимпиада-2022ни дипломатик бойкот қилиши мумкинлигини эълон қилган АҚШнинг изидан бориши кераклиги тўғрисида "фаол мунозара" бормоқда. Нашрнинг таъкидлашича, Буюк Британия ташқи ишлар вазири Элизабет Трасс бу ғояни қўллаб-қувватламоқда.

XXIV қишки Олимпиада ўйинлари Пекинда 2022 йил 4-20 февраль кунлари, Паралимпия ўйинлари 4-13 март кунлари бўлиб ўтади.

Аввалроқ The Washington Post газетаси АҚШ маъмурияти Пекин Олимпиадасини дипломатик бойкот қилишни режалаштираётганини маълум қилганди.

Бу борадаги якуний қарор ҳозирча қабул қилинмаган. Газетанинг ёзишича, президент Байденга бойкот бўйича тавсиялар тақдим этилган. Президент шу ой охиригача қарор қабул қилиши кутилмоқда.