Германияда самолёт кўприкка қўниб, йўл-транспорт ҳодисаси келтириб чиқарди

Германия жанубида кичик ўлчамли А62 самолёти автомобил кўпригига фавқулодда қўнишни амалга ошириб, юк машинаси билан тўқнашиб кетди. Бу ҳақда Пирмазенс шаҳри полициясида маълум қилинди.

Фото: twitter.com/Polizei_PS

Таъкидланишича, воқеа 4 декабр соат 12 атрофида юз берган. 72 ёшли учувчи бошқарган самолёт Франциядан Қуйи Саксония томон йўналаётганда унинг двигатели ишламай қолган.

Оқибатда учувчи фавқулодда қўнишга мажбур бўлган ва қўниш учун Рейнланд-Пфальц еридаги Шварцбахтальбрюкке кўпригини танлаган. Таъкидланишича, кўприк баландлиги 100 метрга яқинни ташкил қилади.

Самолётнинг кўприкка кутилмаганда қўниши йўл-транспорт ҳодисасини келтириб чиқарган. Самолётга юк машинаси келиб урилган. Бунинг оқибатида учувчи енгил жароҳат олган, ҳайдовчига ҳеч нарса қилмаган. Бироқ ноодатий йўл-транспорт ҳодисаси автобан бўйлаб ҳаракатнинг 6 соатдан кўпроқ тўхтаб қолишига сабаб бўлган.