Франция президентлигига номзод ҳужумга учради

Франция президенти лавозимига номзод, журналист Эрик Земмур 5 декабрда сайловолди намойиши вақтида ҳужумга учради. Воқеа Париж яқинидаги Вильпент коммунасида юз берди, деб хабар берди BFMTV телеканали.

Земмур тансоқчилари ва журналистлар ҳамроҳлигида минбарга йўл олаётганда унга оломон орасидан бир эркак ҳужум қилган. У Земмурнинг бошидан ушлаб, уни ерга йиқитмоқчи бўлган. Хавфсизлик хизмати ходимлари аралашуви билан эркакнинг режаси амалга ошмаган. Эркак қасддан ҳужум қилиш айблови билан ҳибсга олинган.

Полицияда маълум қилинишича, Земмурга ҳужум қилган эркакнинг шахси аниқланган. Таъкидланишича, у бунгача ҳам турли қоидабузарликлар содир этган. Эркакнинг хатти-ҳаракатлари сабаби ҳозирча номаълум. 

Бундан ташқари, намойиш вақтида журналистнинг тансоқчилари SOS Racisme уюшмаси фаоллари билан муштлашиб кетган. Телеканал маълумотларига кўра, тадбир давомида 12 нафар фаол “Ирқчиликка йўқ!” деб ҳайқира бошлаган ва тартибсизлик келтириб чиқарган. Натижада уюшма вакиллари тадбирни тарк этган.

30 ноябрда 63 ёшли Эрик Земмур Франция президенти лавозимига номзодини илгари суришини эълон қилди. Журналист ўта радикал сиёсий қарашларга эга бўлиб, мигрантларни ўз юртларига қайтариш тарафдори ҳисобланади. Жумладан, у Франциядан 2 млнга яқин хорижликни чиқариб юборишга чақирган. Бунгача Земмур ирқий ва диний адоватни қўзғашда 2 марта айбдор деб топилган. Журналистнинг баъзи рақиблари уни “ирқчилик ва фашизм”да айблайди.   

Земмур Quotidien de Paris ва Le Figaro нашрларида, France 2 ва Cnews телеканалларидаги фаолияти сабабли Францияда маълум машҳурликка эга. У Вильпентдаги учрашувда Францияни НАТОдан олиб чиқмоқчи эканини айтган.

Айни вақтда Франция президенти лавозимига номзодлар рўйхатига 40 нафардан кўпроқ киши кирган. Мамлакатда навбатдаги президент сайловлари 2022 йил апрелига белгиланган.