Буюк Британияда “омикрон” штамми билан боғлиқ ўлим ҳолатлари еттитага етди

Мамлакатда ўтган суткада ушбу штаммни юқтириш билан боғлиқ 10059та ҳолат аниқланган

Фото: EPA/Vostock-photo

Буюк Британияда “омикрон” штамми билан боғлиқ еттита ўлим ҳолати қайд этилди. Бу ҳақда Бирлашган Қироллик соғлиқни сақлаш хавфсизлиги агентлиги хабар берди.

Агентликнинг билдиришича, барча ҳолатлар Англияга тўғри келади.

Бундан ташқари, мамлакатда ўтган суткада ушбу штаммни юқтириш билан боғлиқ 10059та ҳолат аниқланган – “омикрон” юқтирганлар сони 24968 нафарга етди. Таққослаш учун, 13 декабрда бу кўрсаткич 4713 нафарни ташкил этаётганди.

Шанба куни Буюк Британияда 90,4 минг кишида коронавирус аниқланди. Бир кун аввал бу рақам 93 мингдан ортиқроқ бўлганди.