«Кунига 10 тонна сутни қайта ишлаймиз» - йилнинг энг яхши ёш тадбиркори фаолиятига назар

Шоҳрух Қаландаров «Хонқа чорва капитал» корхонасига раҳбарлик қилади. У чорвачилик, сутни қайта ишлаш ва инновацион гидропоника усулида яшил озуқа етиштириш билан шуғулланмоқда. Тадбиркор билан учрашиб, фаолиятининг айрим жиҳатлари ҳақида суҳбатлашдик.

«Чорвачилик, сутни қайта ишлаш, гидропоника усулда яшил озуқа етиштириш билан шуғулланамиз. Сутни кунига 10 тоннагача қайта ишлайдиган заводимиз бор. 28 турдаги маҳсулотлар қайта ишланиб, бозорга етказиб берилмоқда», деди у.

Корхонада кўплаб чорва моллари, эчкилар боқилмоқда. Улар инновацион усулда етиштириладиган озуқа билан боқиляпти.

«Фермамизда Голландиядан келтирилган 650 бошдан ортиқ наслли қорамол ва Испаниядан келтирилган 450 бошдан кўпроқ зотдор эчки бор. Уларни ўзимизда етиштириладиган яшил озуқа билан боқамиз.

Ўзбекистонда биринчилардан бўлиб гидропоника усулда яшил озуқа етиштиришни йўлга қўйганмиз. 2,5 кг буғдойни 5 кун ичида 18 кг майсага айлантириш технологиясини Испаниядан олиб келганмиз. Яшил озуқани етиштиришда ҳаво ҳарорати жуда катта аҳамиятга эга бўлиб, ҳар доим бир хил 19 даража ҳаво ҳароратида сақланиши лозим».

Фермадаги серсут, зотдор эчкилар Испаниядан келтирилган. Уларнинг сути шу ернинг ўзида қайта ишланяпти.

«Испаниядан 200 бошдан ортиқ Мурсиана-Гранадина зотли эчкиларни олиб келган эдик. 5 ойда уларнинг сони 450 дан ошди. Зотдор эчкилар кунига 3-5 литргача сут беради ва 2-3 тадан болалайди. Уларнинг сутини заводда қайта ишлаймиз».

Ҳозирги кунда мажмуада 71 нафар ишчи банд бўлиб, уларнинг 30 фоизи ёшларни, 10 фоизи темир дафтарга киритилган аёлларни ташкил қилади.

25 ёшли ишбилармон «Ташаббус 2021» кўрик-танловида «Йилнинг энг яхши ёш тадбиркори» номинациясида ғолиб бўлган.

Нурмуҳаммад Саид