Британияда илк бор кунлик касалланиш ҳолати 100 мингдан ошди

Британияда охирги суткада коронавирусдан 106 минг 122та касалланиш ҳолати қайд этилди. Sky News нашрининг хабар беришича, бу пандемия бошидан бери мамлакат учун рекорд кўрсаткич ҳисобланади. Шунингдек, 140 киши коронавирус қурбони бўлган.

Фото: AP

Бир кун аввалги касалланиш кўрсаткичи 90,6 мингни, ўлимлар сони 172тани ташкил қилган.

Бирлашган қироллик соғлиқни сақлаш вазири ўринбосари Жиллиан Киганнинг таъкидлашича, ҳозирда мамлакат шифохоналарида коронавируснинг янги штамми омикрондан касалланган 129 бемор даволанмоқда. Шунингдек, ундан вафот этганлар сони 14 нафарга етган. Таъкидлаб ўтиш жоиз, омикрондан дунёдаги биринчи ўлим ҳолати айнан Британияда қайд этилганди.

Аввалроқ Лондон мэри Содиқ Хон омикрон билан касалланиш ҳолатлари кўпаяётгани сабабли шаҳарда фавқулодда вазият эълон қилганди. Декабр бошида Британия бош вазири Борис Жонсон коронавирус тарқалишига қарши Англияда “Б режа”ни амалга киритганди. Ушбу режа жамоат жойларида ниқоблар тақиш ва эмланганлик ҳақидаги сертификатларни қўллашни, одамларнинг уйидан ишлашини кўзда тутади.