АҚШ Африка мамлакатларидан киришга қўйилган тақиқни бекор қилади

Қарор касалликларни назорат ва профилактика қилиш маркази тавсияси асосида қабул қилинди.

Фото: Hannah Beier/Reuters

АҚШ коронавируснинг «омикрон» штамми аниқланган Африка мамлакатларидан киришга қўйилган тақиқни бекор қилади. Бу ҳақда Оқ уй матбуот котиби ёрдамчиси Кевин Муньос маълум қилди.

Тақиқ 31 декабрдан олиб ташланади.

Унинг сўзларига кўра, бу қарор касалликларни назорат ва профилактика қилиш маркази тавсияси асосида қабул қилинди.

«Чекловлар бизга «омикрон»ни ўрганиш учун вақт берди ва биз мавжуд вакциналар унга қарши ишлашини биламиз», — деди у.

CDC АҚШда коронавирус кенг тарқалганини ҳисобга олиб чекловларни бекор қилишни тавсия қилган, чунки тақиқ касаллик тарқалишига сезиларли таъсир кўрсатмайди.

Бундан ташқари, экспертларнинг фикрича, «омикрон»га қарши курашиш учун махсус вакцина талаб қилинмайди.

Reuters суҳбатдошининг айтишича, тақиқ мамлакатга янги штаммнинг кириб келишига йўл қўймаслик учун эмас, балки дастлабки кун ва ҳафталарда касаллик юқтиришлар сонини камайтириш учун киритилган. Унинг қайд этишича, ҳукумат АҚШга «омикрон» кириб келишига тўсқинлик қила олмаслигини тушунган.

АҚШ 29 ноябрда ЖАР, Ботсвана, Зимбабве, Намибия ва Африка жанубидаги яна тўрт мамлакатда икки ҳафта давомида бўлган хорижликларнинг Қўшма Штатларга киришини тақиқлаганди.