Коррупцияга қарши курашиш юзасидан жамоатчилик фикри натижалари эълон қилинди

Аксилкоррупция агентлигининг маълум қилишича, сўровларда коррупцияга қарши курашиш бўйича давлат сиёсати, агентлик фаолияти  каби соҳага доир мавзулардан аҳолининг хабардорлик даражаси ўрганилган.

Қатнашчиларнинг асосий қисми, яъни 82,4 фоизи Ўзбекистонда коррупция, тамагирлик ва порахўрлик ўзлари учун ўткир муаммо ҳисобланишини айтган. Шунингдек, 36,2 фоиз респондентлар жамиятдаги коррупция, тамагирлик ва порахўрлик ҳамма жойда, 37,2 фоизи эса айрим соҳаларда тарқалганини таъкидлаган.

Деярли 70 фоиз иштирокчилар ОАВ томонидан Ўзбекистондаги коррупция, тамагирлик ва порахўрликка қарши курашиш етарли даражада ёритилаётганини таъкидлаган бўлса, 27 фоиздан ортиқ қатнашчилар буни рад қилган.

Аҳолининг коррупцион ҳолатлар ва унга қарши курашиш бўйича асосий маълумотлар манбаси Ўзбекистон телеканаллари ва интернет-ресурслар бўлиб қолмоқда.

42,7 фоиз иштирокчилар Ўзбекистонда коррупцияга қарши курашиш етарли даражада муваффақиятли, деб ҳисоблаган бўлса, 31,6 фоизи бу муваффақият барча соҳада ҳам эмас, дея баҳолаган. 19,1 фоиз респондентлар эса Ўзбекистонда коррупцияга қарши курашни кам самарали, дея баҳолаган.

Шунингдек, қатнашчиларнинг 20 фоизга яқини ўз ҳаётида коррупция, тамагирлик, порахўрлик билан боғлиқ вазиятга дуч келганини айтган бўлса, 79,6 фоизи буни рад қилди.