Францияда олти ёшдан катта болаларга ниқоб тақиш мажбурий этиб белгиланди

Францияда коронавируснинг “омикрон” штамми тарқалиши ҳолатлари кескин ошгани сабабли олти ёшдан катта болаларга жамоат жойларида ниқоб тақиш мажбурий этиб белгиланди. 

Аввалроқ ушбу талаб 11 ёшдан катта болаларга жорий этилганди.

Ҳукумат қарори 3 январдан кучга киради. Болалардан жамоат муассасалари, ибодатхона, ошхона, транспорт, спорт майдончаси, ёпиқ бозорлар ва вокзалларда ниқоб тақиш талаб қилинади.

Парижда 31 декабрдан кўчада ниқоб тақиш мажбурий этиб белгиланганди. Бундай талаб бошқа йирик шаҳарларда ҳам жорий этилди.

Маълумот берилишича, ўтган суткада Францияда 232 минг кишида коронавирус аниқланган. Пандемия бошланганидан буён мамлакатда коронавирус юқтириш билан боғлиқ қарийб 10 миллион ҳолат қайд этилган, 123 мингдан зиёд бемор вафот этган. Франция соғлиқни сақлаш вазири Оливье Вераннинг сўзларига кўра, ҳар сонияда икки нафар француз коронавирус юқтирмоқда.