Ўзбекистон ва Туркия президентлари Қозоғистонда зўравонлик ва вазият кескинлашувига йўл қўймаслик муҳимлигини таъкидлади

Ўзбекистон ва Туркия президентлари икки томонлама ва минтақавий аҳамиятга молик долзарб масалаларни муҳокама қилишди.

6 январь куни Ўзбекистон Республикаси президенти Шавкат Мирзиёев ва Туркия Республикаси президенти Ражаб Тоййиб Эрдўғаннинг телефон орқали мулоқоти бўлиб ўтди.

«Суҳбат давомида икки мамлакат раҳбарлари Ўзбекистон билан Туркия ўртасидаги стратегик шериклик муносабатларининг ҳозирги ҳолати ва истиқболларини, ҳамкорликни янада фаоллаштириш масалаларини муҳокама қилдилар. Шунингдек, Марказий Осиё минтақасидаги вазият, хусусан, Қозоғистонда вужудга келаётган ҳолат юзасидан фикр алмашдилар.

Президентлар Қозоғистонда тинчлик ва барқарорликни таъминлашга қаратилган барча чораларни кўриш зарурлиги тўғрисида умумий фикр билдирдилар.

Шу билан бирга, давлат раҳбарлари вужудга келган ҳолатни тинч йўл билан ҳал қилишга чақириб, зўравонлик ва вазият кескинлашувига йўл қўймаслик муҳимлигини таъкидлаб ўтдилар», дейилади президент матбуот хизмати хабарида.

Бунгача Ўзбекистон раҳбари Қозоғистон президенти Қосим-Жўмарт Тўқаев ҳамда Тожикистон президенти Имомали Раҳмон билан телефон орқали мулоқот қилиб, қўшни республикадаги вазиятни муҳокама қилганди.

Тайёрлаган Азиз Қаршиев

#намойишлар #Шавкат Мирзиёев #Қозоғистон

2 январь куни Қозоғистоннинг Манғистау областида суюлтирилган газ нархи икки бараварга кўтарилганидан норози бўлган қозоғистонликлар оммавий митингга чиқишди ва кейинги кунларда намойишлар бутун мамлакат бўйлаб ёйилди.