Янги йўл келтирган янги ташвиш: Самарқанддаги маҳалла аҳли 50 йиллик кўча беркитилаётганидан норози

Менделеев 2-берк кўчасида азалдан истиқомат қилиб келаётган 10 та хонадонга кирувчи кўча девор билан беркитилиб, одамлар кириб чиқиши учун кичикроқ эшик қолдирилиши ваъда қилинмоқда.

Берк кўчадан эса снос қилинган уйлар ўрнидан янги йўл қурилмоқда. Ушбу йўл қурилса, катта кўча ёқасида яшаб келган уйлар маҳалланинг энг охирги уйларига айланади. Чунки шундоққина Бўстонсарой кўчасидан бурилиб кириш мумкин бўлган уйларга 800 метр наридаги Даҳбед кўчасидан кириб келиш керак бўлади.

Одамлар кўча беркитилса, маҳаллага тез ёрдам, ўт ўчириш машинаси кириши қийинлашишини айтишмоқда. Уйлардан бирида инсультга йўлиққан оғир касал ҳам борлигини айтишди.

Шунингдек, одамлар фарзандларини мактабга, боғчага ўз автомашинасида олиб бориш учун қийнала бошлашади. Янги барпо этилаётган кўча Даҳбет кўчасига олиб чиқади ва бунинг учун машинада 800 метр йўл босиш керак бўлади. У кўчада СамМИ клиникасининг орқа дарвозаси ва бир нечта хусусий клиникалар жойлашган бўлиб, доимо тирбанд бўлади.

Янги кўча ўтказилиши туфайли маҳалланинг ичимлик суви ва газ таъминоти ҳам узилган. Биз борганда ичимлик сув тармоғини улаш ишлари олиб борилаётганди.

Бўстонсарой кўчасига ёндош маҳаллаларга кириш кўчаларининг барчаси ҳам ёпилмаган. Менделеев кўчасида яшовчилар нега айнан улар яшаётган кўча беркитиб қўйилганидан ҳайрон бўлишмоқда. Чунки аввал бошда бунақа режа бўлмаган кўринади. Чунки маҳаллага кириш йўли учун жой қолдирилган. Тротуар ҳам йўл олдида узиб қўйилган.

Шу маҳаллада яшовчилар 30 йил ичида ҳеч қачон кўчадан чиқишда йўл-транспорт ҳодисаси рўй бермаганини айтишди. Кўча кенгайгач, бурилиш қайтага янада хавфсиз бўлганини таъкидлашмоқда.

Албатта, Бўстонсарой кўчасидан қаралганда уйларнинг фасади рисоладагидек таъмирланмагани мутасадди раҳбарлардан кимгадир ёқмаган бўлиши мумкин. Лекин делегациялар шу йўлдан «зув» этиб ўтишади—кетишади. Бу одамлар эса бу ерда умрбод яшашлари керак. Бунинг учун уларга доимий бошоғриқ қилиш шартмикан?

Албатта, аҳоли кўчасиз қолиб кетгани йўқ. Уларга янги йўл солиб берилмоқда. Аммо катта кўча ёқасида яшаш бошқа, уйга элтувчи узоқ кўчанинг энг охирида яшаш бошқа. Албатта, уларга алам қилади.

Пайдо бўлган муаммо юзасидан Самарқанд шаҳар мутасаддилари нима дер экан? Масалани маҳаллий аҳолини норози қилмасдан ечиш йўли бормикан?

Шуҳрат Шокиржонов, Kun.uz мухбири.
Монтажчи: Фахриддин Ҳотамов.