«Тергов натижалари кўрсатади» - Қозоғистон ташқи ишлар вазири Назарбоевнинг тартибсизликларга алоқадорлиги ҳақида

Аввалроқ Қозоғистоннинг биринчи президенти Нурсултон Назарбоев видеомурожаат қилиб, пойтахтдан ҳеч қаерга кетмаганини айтганди.

Фото: РИА Новости

Қозоғистон ташқи ишлар вазири Мухтар Тилеуберди собиқ президент Нурсултон Назарбоевнинг мамлакатдаги тартибсизликларга алоқадорлиги эҳтимоли ҳақида гапирди. Бу ҳақда Euractiv нашри ёзмоқда.

Назарбоев ва унинг оиласи аъзоларининг тартибсизликларга алоқадорлиги ҳақидаги саволга жавоб бераркан, Тилеуберди «бундай деб ўйламаслигини, аммо ҳаммасини тергов натижалари кўрсатиб бериши»ни айтди.

Тилеуберди собиқ президентнинг қаерда эканлиги тўғрисидаги саволга унинг қаердалигини билмаслигини айтди, сўнгра Назарбоевнинг 18 январдаги мурожаатига мувофиқ собиқ президент пойтахтдалигини қўшимча қилди.

Сўнгги маълумотларга кўра, Қозоғистонда содир бўлган тартибсизликлар оқибатида 225 киши ҳалок бўлган, 4,5 минг киши жароҳатланган.

18 январ куни Қозоғистоннинг биринчи президенти Нурсултон Назарбоев намойишлардан кейин илк марта оммага кўриниш берди. У видеомурожаат қилиб, пойтахтдан ҳеч қаерга кетмаганини айтди.

Тайёрлаган Дилшод Аскаров

#Нурсултон Назарбоев #Қозоғистон

2 январь куни Қозоғистоннинг Манғистау областида суюлтирилган газ нархи икки бараварга кўтарилганидан норози бўлган қозоғистонликлар оммавий митингга чиқишди ва кейинги кунларда намойишлар бутун мамлакат бўйлаб ёйилди.