Тошкентда йўлнинг ўртасида овқатланган йигитнинг онасига маъмурий баённома расмийлаштирилди

Аниқланишича, жорий йилнинг 31 январь куни тахминан соат 10:00 ларда вояга етмаган, 2004 йилда туғилган С.О. Шайхонтоҳур тумани “Хадра” МФЙ ҳудудидаги йўлнинг қатнов қисмидаги бордюр устида овқатлангани видеотасвирга олинган. 

“Вояга етмаган С.О. ушбу хатти-ҳаракатлари билан ўзи ва атрофдаги шахсларнинг ҳаётини хавф остига қўйиб, жамиятда юриш-туриш қоидаларини қасддан менсимаган”, дейилади хабарда. 

Мазкур ҳолат юзасидан вояга етмаган С.О. билан профилактик суҳбат ўтказилган, унинг онасига эса Маъмурий жавобгарлик тўғрисидаги кодекснинг 47-моддасига (“Болаларни тарбиялаш ва уларга таълим бериш борасидаги мажбуриятларни бажармаслик”) асосан маъмурий баённома расмийлаштирилди.   

“Ҳурматли ота-оналар! Фарзандингиз қаерда юргани ва нималар билан банд эканидан доимий равишда хабардор бўлиб юринг. Йўлнинг транспорт воситалари учун белгиланган қатнов қисми ўйин майдони эмас. Биргина “лайк” ортидан қувиш инсон ўлими билан якун топиши мумкинлигини унутманг”, дейилади ИИББ маълумотида.