Украина биз билан урушадиган бўлса, уруш кўпи билан уч-тўрт кун давом этади — Лукашенко

Лукашенконинг сўзларига кўра, улар Беларусь, биринчи навбатда Россия билан уруш қилиш истиқболсиз эканлигини тушунади.

Фото: Беларусь президенти матбуот-хизмати

Беларусь президенти Александр Лукашенко Украина ҳеч қачон Беларусь билан уруш қилмаслигини айтди.

«Украина биз билан ҳеч қачон урушмайди. Уруш бўлса, узоғи билан уч-тўрт кун давом этади. У ерда бизга қарши жанг қиладиган ҳеч ким йўқ. Бизга кўрсатишаётган автомат кўтарганлар эса ёғоч автоматларда машқ қилишяпти»,— деди Александр Лукашенко «Соловьев Live» YouTube-каналига берган интервьюсида.

«Биз қандайдир ядровий ёки бошқа қурол тўғрисида гапирмаяпмиз. Бизга тегишмагани маъқул. Бизга тегманг»,— деди Беларусь президенти.

Унинг сўзларига кўра, Украина Беларусь, биринчи навбатда Россия билан уруш қилиш истиқболсиз эканлигини тушунади.

Аввалроқ Лукашенко Россия мудофаа вазири Сергей Шойгу билан учрашуви чоғида Беларусь Россиянинг қўллаб-қувватлови остида замонавий қуролланиш марказини ташкил этишга тайёрлигини билдирганди.