АҚШ десантчилари самолётлари Польшага келиши давом этмоқда

7 февраль куни Американинг C-17А Globemaster III оғир ҳарбий-транспорт самолёти АҚШ армияси 82-ҳаво-десант дивизияси бўлинмасини Польшага олиб келди.

Самолёт Форт-Брегг базасидан (Шимолий Каролина штати) учган. У Польшанинг Украина билан чегарадан 90 км масофадаги Жешув шаҳрига қўнган. Вашингтон маъмурияти қарорига кўра, бу ерда 82-ҳаво-десант дивизияси таркибидаги 1,7 минг десантчидан иборат бригада гуруҳи жойлаштирилади.

Кун аввалида Жешув-Ясенка аэропортига яна бир C-17A Globemaster III ҳарбий-транспорт самолёти келиб қўнганди, Довер шаҳри (Делавэр штати) яқинидаги авиабазадан учган самолёт юк келтирган.

Яқин вақт ичида Польшага америкалик десантчиларни олиб учган яна бир самолёт келиши кутилмоқда. Бу самолёт ҳам Форт-Бреггдан ҳавога кўтарилган.

АҚШ армиясининг Европадаги қўмондонлиги маълумотига кўра, Америка десантчиларининг илғор гуруҳи якшанба куниёқ Польшага етиб келган. Биринчи рейс билан ҳарбий-транспорт самолёти Жешувга 82-дивизия генерали Кристофер Донахьюнинг бир неча ўн кишилик бўлинмаси ва ҳарбий техникаларни олиб келган.

Ўтган ҳафта охирида Германиянинг Висбадендаги базасига 82-дивизия таркибидаги 18-ҳаво-десант корпуси оператив штаби ҳарбий хизматчилари келганди.

Ўтган ҳафтанинг чоршанба кунида ўтказилган брифинг чоғида Пентагон расмий вакили Жон Кирби АҚШ қуролли кучлари қўмондонлиги Украина атрофидаги вазият кескинлашгани туфайли ГФР, Польша ва Руминияга қўшимча кучлар ташлаши ҳақида маълум қилганди.

Шу билан бирга, у бу қўшинлар Украинада жанг қилмаслигини айтган. «Улар НАТО бўйича иттифоқчиларнинг ишончли ҳимоясини таъминлаши керак», деганди у.

Иттифоқчилар хавфсизлигини мустаҳкамлаш учун Европага қўшимча 3 минг америкалик ҳарбий хизматчи жойлаштирилиши режалаштирилган.