Маданий мерос агентлиги Космонавтлар майдонидаги реконструкция лойиҳасини маъқуллади

Маданий мерос агентлигининг Илмий-эксперт кенгаши Тошкентдаги Космонавтлар майдонини реконструкция қилиш лойиҳасига розилик берди.

15 феврал куни қабул қилинган қарорда объектнинг тарихий ва бадиий қийматига зиён етказилмаслиги талаб қилинган.

Таъкидлаш лозим, космонавт Владимир Жонибеков бюсти атрофидаги майдоннинг гранит плиталари аввалдан рухсат олинмасдан, 13–14 феврал кунлари кўчириб ташланган эди.

14 феврал куни Маданий мерос агентлиги таъмирлашни олиб бораётган “Mimar Group” МЧЖга огоҳлантириш берди, шундан кейин бироз муддат тўхтатилган таъмирлаш ишлари ҳали рухсат олинмаганига қарамай 15 феврал куни давом эттирилди.

Бу ердаги таъмирлаш ишлари ҳақида олдиндан хабар берилмагани ва шаҳар ҳокимлигининг қонунни менсимаётгани жамоатчиликда эътирозлар уйғотди. 15 феврал куни шаҳар ҳокими Жаҳонгир Ортиқхўжаев ва бош вазир ўринбосари, туризм ва спорт вазири Азиз Абдуҳакимов Космонавтлар майдонига келиб, ҳолатга муносабат билдиришди.

Ортиқхўжаев майдон ҳомийлик асосида таъмирланаётгани ва тегишли рухсат шу соатларда олинганини айтган бўлса, Азиз Абдуҳакимов ҳали рухсат берилмагани, масъуллар зарурий ҳужжатларни агентликка тез орада тақдим этиши кутилаётганини билдирганди.