Америкалик эксперт Россия Украинага ҳужум қиладиган янги санани маълум қилди

Россия Украинага 20 февралдан кейин бостириб кириши мумкин, деб ёзди Politico нашри эксперт фикрига таяниб.

CNA таҳлил марказининг Россия қуролли кучлари бўйича эксперти Майкл Кофманнинг фикрича, Россия армиясининг ҳаракатларини айнан шу санадан сўнг кузатиш керак.

Таъкидланишича, 20 феврал куни Россия ва Беларусь ҳамкорлигидаги «Иттифоқ қатъияти» ҳарбий машғулотлари якунига етади. Кузатувчилар ғарбий ҳарбий округ ҳарбийлари ростдан ҳам шарққа қайтган-қайтмаганини кузатиши керак, деди таҳлилчи.

Бундан ташқари, 20 феврал куни хавфсизлик бўйича Мюнхен конференцияси якунланади, дея қайд этган Politico. Россия Украина президенти Владимир Зеленский ва АҚШ давлат котиби Энтони Блинкен Европада бўлиб турган вақтда ҳужум бошлайди, дейилади мақолада. 

Шунингдек, таҳлилчи Россия Украинага 20 февралдан кейин ҳужум қилишининг яна бир сабаби сифатида Пекиндаги Олимпия ўйинларини кўрсатган. Россия Олимпиада ёпилиш маросими ўтказилмагунича ҳужум қилмайди, дея фикр билдирган эксперт. 

Ғарб ОАВ бир неча ойдан буён Россия Украинага бостириб кириши ҳақида ёзмоқда. Аввалроқ қатор нашрлар ҳужум 16 феврал куни бошланишини ёзганди.