«Ҳозир 2014 йилнинг феврали эмас, 2022 йилнинг феврали. Бизда бошқа давлат, бошқа армия бор». Владимир Зеленский халққа мурожаат қилди 

«Уйқусиз тунни ўтказиш учун ҳеч қандай сабаб йўқ», – деди давлат раҳбари. 

Президент Украинанинг халқаро миқёсда тан олинган чегаралари, Россиянинг ҳаракатларига қарамай, ўзгаришсиз қолишини таъкидлади. Зеленскийнинг маълум қилишича, Украина Россиянинг сўнгги ҳаракатларини давлат суверенитети ва ҳудудий яхлитлигини бузиш сифатида баҳолайди.

«Украина Россия Федерациясининг сўнгги ҳаракатларини тўлиқ давлатнинг суверенитети ва ҳудудий яхлитлигини бузиш сифатида баҳолайди», деди президент. 

Унинг сўзларига кўра, бу қарорлар оқибатлари учун барча жавобгарлик Россия сиёсий раҳбариятига юкланади.

«Босиб олинган Донецк ва Луганск областлари туманларининг мустақиллигини тан олиш Россиянинг Минск келишувларидан бир томонлама чиқиб кетиши ва норманд келишуви доирасидаги қарорларни менсимаслигини англатади», деди Зеленский. 

Унинг таъкидлашича, бу тинчликка эришиш саъй-ҳаракатларига путур етказади ва музокаралар форматини бузади.

«Россия 2014 йилдан бери Донбасснинг босиб олинган ҳудудларида ўз қўшинларига эга. 8 йил давомида урушни қўллаб-қувватлаган давлат, ўзи айтганидек, тинчликни сақлай олмайди», — деди давлат раҳбари. 

«Биз ўз юртимиздамиз, ҳеч нарсадан, ҳеч кимдан қўрқмаймиз. Биз ҳеч кимдан қарздор эмасмиз, ҳеч кимга ҳеч нарса бермаймиз. Бунга ишончимиз комил, чунки ҳозир 2014 йилнинг феврали эмас, балки 2022 йилнинг феврали. Бошқа давлат, бошқа армия, битта мақсад. Бу - Украинада тинчлик! Украинага шон-шарафлар!» - дея хулоса қилди Зеленский. 

Аввалроқ, Владимир Путин, Денис Пушилин ва Леонид Пасечник Россия ДХР ва ЛХР мустақиллигини тан олиш тўғрисидаги ҳужжат ҳамда дўстлик ва ўзаро ёрдам тўғрисидаги шартномаларни имзолаганди.

21 феврал куни ўзини ўзи мустақил деб эълон қилган Донецк халқ республикаси ва Луганск халқ республикаси раҳбарлари Россия президентидан бу республикаларни тан олишни сўраганди.