Риштон туманида ғойиб бўлган она ва қизлари қидирувга берилган. Кичик қизнинг жасади Катта Фарғона каналидан топилди

Фарғона вилояти Риштон туманида оилавий келишмовчилик сабаб икки қизи билан уйдан чиқиб кетган она қидирилмоқда. Кичик қизнинг жонсиз танаси Катта Фарғона каналидан топилган. Бу ҳақда Фарғона вилояти ФВБ матбуот хизмати хабар берди.

Қайд этилишича, 21 февраль куни Риштон тумани “Зоҳидон” МФЙ Қўрғонча кўчасида истиқомат қилувчи Н.Г. исмли аёл ва унинг икки нафар қизи яшаш хонадонидан чиқиб кетиб қайтиб келмаган.

Шу куни оиланинг кичик қизи Х.Ш.нинг жонсиз танаси Бағдод тумани “Ирғоли” МФЙ ҳудудидан оқиб ўтувчи Катта Фарғона каналидан топилган.

Катта Фарғона каналида қидирув ишлари 22 февраль кунидан буён давом этмоқда. Унда Фарғона вилояти ФВБ Махсус вазифаларни бажарувчи минтақавий қутқарув отряди ғаввос-қутқарувчилари ҳам иштирок этмоқда.

Маълумотларга кўра, қидирилаётган она ва боланинг Катта Фарғона каналига ўзини ташлаб юборганига ҳеч ким гувоҳ бўлмаган. Оиладаги кичик қизнинг жонсиз танаси каналдан топилиши ортидан она ва тўнғич қиз ҳам сувга чўкканликда гумон қилиниб, қидирув-қутқарув ишлари олиб борилмоқда.

Аввалроқ, 22 ёшли аёл турмуш ўртоғи билан жанжаллашиб қолиб, жаҳл устида яшаш хонадонига яқин бўлган Катта Фарғона каналига ўзини ташлаб юборганлиги, унинг жасади уч кундан сўнг топилгани ҳақида хабар берилган эди.