Польша чегарасида ўзбекистонликлар автоҳалокатга учради, бир киши вафот этди

Украинадан эвакуация қилинаётган уч нафар ўзбекистонлик Польша чегарасида автоҳалокатга учради. Бу ҳақда Ўзбекистоннинг Украинадаги элчиси Алишер Қурмонов хабар берди.

Қайд этилишича, Ўзбекистоннинг уч фуқароси: Отабек Ҳакимов (2001 йилда туғилган), Беҳзод Ҳусаинов (2001 йилда туғилган) ва Шерзод Салоҳиддинов (2001 йилда туғилган) Польша чегарасига кираверишда автоҳалокатга учраган.

Фожиа натижасида Отабек Ҳакимов воқеа жойида вафот этган, қолган икки ўзбекистонлик Львовдаги шаҳар касалхонасига олиб борилган.

“Ушбу воқеаларни инобатга олиб, Ўзбекистоннинг Киевдаги элчихонаси зудлик билан элчихона кўнгиллилари гуруҳи вакили, малакали шифокор Темурбек Юсуповни Львовга жўнатди. Унинг Львовга келиши бугун 5 март куни кутилмоқда.

Отабек Ҳакимовнинг яқинларига ҳамдардлик билдирган ҳолда, жабрланган ватандошларнинг барча қариндошлари ва яқинларини ишонтириб айтамизки, элчихона уларнинг ҳаётини сақлаб қолиш, жумладан, дори-дармонлар билан таъминлаш ва Украинанинг етакчи шифокорлари билан маслаҳатлашиш учун барча саъй-ҳаракатларини амалга оширади”, дейилади элчи хабарида.

Билдирилишича, элчихона О. Ҳакимовнинг жасадини тез вақтда Ўзбекистонга жўнатиш бўйича саъй-ҳаракатларни амалга оширади. 

“Шу билан бирга, биз бу масалани ҳал қилиш мамлакатда олиб борилаётган ҳарбий ҳаракатлар ва оммавий эвакуация туфайли мураккаблашаётганини тушунишингизни сўраймиз”, дейилади маълумотда.