Олмалиқ шаҳрида тадбиркордан пора талаб қилган муҳандис ушланди

У ишлаб чиқариш цехи учун сув қувурини ўтказишга техник шарт ва лойиҳа-смета ҳужжатларини расмийлаштириб бериш эвазига тадбиркордан пул талаб қилган.

Бош прокуратура ҳузуридаги департаментнинг хабар беришича, Олмалиқ шаҳар бўлими томонидан ИИБ билан тезкор тадбир ўтказилган.

Тадбирда, “Тошкент сув таъминоти” МЧЖ Олмалиқ шаҳар бўлими бош муҳандиси У.У., “О.” номли боғдорчилик-узумчилик ширкатига қарашли ҳудудда тери маҳсулотларини қайта ишлаб чиқариш цехи учун сув қувурини ўтказишга техник шарт ва лойиҳа-смета ҳужжатларини расмийлаштириб бериш эвазига тадбиркор Х.дан 900 АҚШ доллари миқдорида пора талаб қилиб, миллий валюта ҳисобида 9,8 млн сўмни олган вақтида ашёвий далиллар билан ушланган.

Мазкур ҳолат юзасидан Жиноят кодексининг 210-моддаси (пора олиш) билан жиноят иши қўзғатилиб, тергов ҳаракатлари ўтказилмоқда.