“Ўзимни ҳимоя қилаётиб, қўлимдаги пичоқни унга санчиб олган эканман” – “Малика”да бир кишининг умрига зомин бўлган йигитга ҳукм ўқилди

2021 йилнинг 12 сентябрь куни Тошкентдаги Кичик ҳалқа йўлининг Шайхонтоҳур ва Лабзак кўчалари кесишувидаги кафе ёнида «Малика» савдо мажмуасида телефон савдоси билан шуғулланувчи бир неча фуқаро ўртасида пичоқбозлик юз берганди. Ҳодиса акс этган видео ижтимоий тармоқларда тарқалганди.

Тошкент шаҳар ИИББ можаро оқибатида бир киши вафот этгани, яна бир киши жароҳат олиб, шифохонага ётқизилгани ҳақида хабар берганди.

Расмий маълумотда 1977 йилда туғилган Т.Б. олган жароҳатлари натижасида кўп қон йўқотиб шифохонада жон бергани, пичоқбозлик иштирокчиси бўлган, 1988 йилда туғилган М.А. бир неча жойидан санчилиб кесилган жароҳатлар билан тиббиёт муассасасига олиб борилган.

Мазкур ҳолат юзасидан Тошкент шаҳар прокуратураси томонидан Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатилганди. 10 март куни айбланувчига ҳукм ўқилди.

“Жабрланувчининг ўзи жанжални келтириб чиқарган ҳамда ҳимоям остидаги шахсга биринчи бўлиб ўзи ҳамла қилган. У айбланувчига биринчи бўлиб қўл кўтарган, бундан ташқари, уни пичоқлаган”, - дейди айбланувчининг адвокати Шоҳида Машарипова.

Таъкидланишича, марҳум ва унинг қотили бир-бирига бегона бўлмаган. Улар аввалдан таниш бўлишган ва “Малика” савдо марказида телефон савдоси билан шуғулланиб келишган.

Судда айбланувчи ўз қилмишига иқрор бўлган. Лекин у қасддан эмас, ўзини ҳимоя қилиш мақсадида бировнинг ўлимига сабаб бўлганини таъкидлаган.

“Марҳум телефон олаётган вақтимда келиб менга гапирди. Шу пайтда у билан ўртамизда келишмовчилик юзага келди. У ташқарига чиқайлик деб айтди. Ташқарига чиқиб ошхонанинг олдига бордик. У ерда унинг акалари, танишлари ўтирган экан. Акаларини чақирди. У ерда уришиб кетдик.

Қарасам, шашликчининг олдида оташкурак турган экан. Уларни қўрқитиш, ўзимни ҳимоя қилиш мақсадида оташкуракни қўлимга олдим. У иссиқ бўлгани учун қайтиб ерга ташлаб юбордим. Кейин шу ердаги пичоқни кўриб қолиб қўлимга олдим. Қочаётган пайтим йиқилиб тушдим. У келиб устимга чиқиб пичоқлаб ташлади. Ўзимни ҳимоя қилаётиб қўлимдаги пичоқни унга санчиб олган эканман”, - дея кўрсатма берган айбланувчи суд залида.

Судда қотилликда айбланаётган судланувчи илгари ҳам беш маротаба судлангани маълум бўлди.

“У мени пичоқлаб ўлдирмоқчи бўлди. Олдиндан режалаштиряпти-ку у бу нарсани. Ўзим ҳам билмай қолдим барчаси қандай содир бўлганини. Ерда ётган жойимда устига ўтириб олиб пичоқлаётганда жон ҳолатда унинг қўлидан қутулмоқчи бўлганимда юз берди-да бу нарса.

Пичоқни унга тиқиб олганимни ўзим ҳам ўша пайтда билганим йўқ. Чунки ҳолатим яхши эмасди. Докторлар ҳаётимни зўрға сақлаб қолишди.

Бўлган ишлардан афсусдаман. Битта одам ўлиб кетяпти-ку. Ўзимни ўзим кечиролмаяпман. Лекин [уни пичоқламасликдан] бошқа иложим ҳам йўқ эди. [Чунки шу йўл билан] ўзимни ўзим ҳимоя қилдим”, - дея айтган судланувчи.

Жиноят ишлари бўйича Шайхонтоҳур тумани судининг ҳукми билан судланувчига 10 йил-у бир ой муддатга озодликдан маҳрум этиш жазоси тайинланди.