Биринчи канал муҳаррири «Время» эфирида Украинадаги урушга қарши чиқиш қилди. Уни қўлга олишди

Россия телевидениесининг Биринчи канали халқаро бўлими муҳаррири Марина Овсянникова душанба куни кечқурун студияда урушга қарши плакат кўтариб чиқиб, «Время» эфирини тўхтатиб қўйди.

«Биринчи канал» эфиридан скриншот

Бошловчи Екатерина Андреева бош вазир Михаил Мишустиннинг халқаро санкциялар оқибатларини юмшатиш режалари бўйича гапираётганди, унинг ортида эса кутилмаганда NOWAR (урушга йўқ) ёзуви туширилган плакат билан Овсянникова пайдо бўлди.

Плакатда инглиз ва рус тилларида «Урушга йўқ. Урушни тўхтатинг. Пропагандага ишонманг. Бу ерда сизни алдашмоқда. Россияликлар урушга қарши» деб ёзилганди ва дастурнинг кейинги қисмига ўтилгунга қадар Овсянникова «Урушни тўхтатинг! Урушга йўқ!» деган сўзларни бир неча бор такрорлашга улгурди.

ТАСС хабарига кўра, Овсянниковани қўлга олишган, унга нисбатан Маъмурий жавобгарлик тўғрисидаги кодекснинг 20.3.3 моддаси бўйича (Россия қуролли кучларини обрўсизлантирганлик учун) протокол тузилган, Биринчи канал эса «жонли эфир чоғида кадрда бегона одам пайдо бўлиши» билан боғлиқ вазият юзасидан хизмат текшируви ўтказишни бошлаган.

Кейинроқ «ОВД-Инфо» Марина Овсянникова «Время» дастурида урушга қарши плакат билан чиқишидан олдин ёзган видеомурожаатни тарқатди.

«Ҳозирда Украинада бўлаётган воқеалар - бу жиноят. Россия - босқинчи мамлакат. Ва бу жиноят учун масъулият фақат бир кишининг виждонига ҳавола. Бу одам - Владимир Путин», - деган у.

Овсянникова унинг отаси украин, онаси эса руслигини айтиб, «улар ҳеч қачон бир-бирига душман бўлмагани»ни таъкидлайди.

Марина сўнгги йилларда Биринчи каналда ишлаб, Кремль пропагандаси билан шуғулланганини афсус билан тан олади ва энди бундан қаттиқ уятда эканини айтади: «Телевизор экранидан ёлғон гапирилишига йўл қўйганим учун уятдаман. Рус кишиларини зомбилаштиришга йўл қўйганим учун уятдаман».

У русларни урушга қарши митингларга чорлаган.

«Биз барчаси энди бошланган 2014 йилда жим турдик. Биз Кремль Навальнийни заҳарлаганида митингларга чиқмадик. Биз бу аксилинсоний режимга индамай қараб турдик. Энди эса бутун дунё биздан юз ўгирди. Ва бизнинг ўнлаб авлодларимиз бу биродаркушлик уруши шармандалигини юва олмайди», деган у.

У бу ақлсизликни тўхтатиш фақат одамларнинг қўлида эканини таъкидлаган.

«Митингларга чиқинг, ҳеч нарсадан қўрқманг, улар барчани қамай олмайди!» - дея мурожаатини якунлаган у.

Аввалига Марина Овсянникова «Останкино»даги ички ишлар бўлимида тутиб турилганини маълум қилинди. Кейинроқ адвокат Павел Чиков 12 соатдан буён адвокатларга у билан кўришишга рухсат берилмаётгани ва у қаердалиги номаълум бўлиб қолаётганини айтди.

Ғарб нашрларининг эрталабки сонлари муқовалари Овсянниковага бағишланди.