Тошкент вилоятида тадбиркорнинг 230 млн сўм кредит маблағини ўзлаштирган шахслар аниқланди

Сут маҳсулотларини қайта ишлаб чиқарувчи 15 дона ускунани олиб беришни ваъда қилиб, оилавий корхонага ажратилган 230 млн сўм кредит талон-тарож қилинган.

Бош прокуратура ҳузуридаги Департаментнинг хабар беришича, Қибрай туман бўлими томонидан тадбиркорлик субъектлари ҳуқуқларини ҳимоя қилиш юзасидан терговга қадар текширув ўтказилган.

Текширувда, “K.m.” МЧЖ раҳбари Ф.М. ва бошқалар олдиндан тил бириктириб, “O.a.” оилавий корхонаси раҳбари Ф.нинг ишончига кириб, унга сут маҳсулотларини қайта ишлаб чиқарувчи 15 дона ускунани олиб беришни ваъда қилиб, оилавий корхонага ажратилган 230 млн сўм кредитни “K.m.” МЧЖга ўтказишга эришиб, ускуналарни етказиб бермасдан, кредит маблағини талон-торож қилгани аниқланган.

Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.