Украинада россиялик ҳарбий асирлар учун лагер пайдо бўлди — Украина бош прокурори

Украина бош прокурори Ирина Венедиктова Украинада россиялик ҳарбий асирлар учун лагер пайдо бўлганини маълум қилди.

«Улар бор, чунки буни Женева конвенцияси талаб қилади. <…> Ҳатто уларга кўрсатилаётган тиббий хизмат деярли ўзимизникиларга кўрсатилаётган даражада.

Мен ўта очиқ бўлишимизни истайман. Биз халқаро гуманитар ҳуқуқ, миллий қонунчилигимиз доирасида ҳаракат қилдик ва кейинчалик саволлар туғдирадиган бирорта чегарани кесиб ўтмадик», — деган у BBC украин хизматига берган интервьюсида.

19 март ҳолатига, Украинада россиялик ҳарбийларнинг 562 нафари асир тушган. Украина ҳукумати вице-премьери Ирина Верешчукнинг аниқлик киритишича, бу якуний маълумотлар эмас. Унинг сўзларига кўра, асирга тушган россиялик ҳарбий хизматчиларнинг ҳақиқий сони мингга яқин бўлиши мумкин.

Украинада россиялик ҳарбийлар учун лагер ташкил этиш ғояси ҳақида илк бор март ойи бошида президент офиси раҳбари маслаҳатчиси Алексей Арестович хабар қилган, у буни «кўп миқдордаги қўлга олинганларни сақлаш мураккаблашгани» билан изоҳлаганди.

Аввалроқ Human Rights Watch халқаро ташкилоти Украина раҳбариятига мурожаат қилиб, россиялик асирлар ва уларнинг шахсий маълумотлари акс этган видеоларни намойиш этмаслик ва тарқатмасликни сўраганди. Ҳуқуқ фаоллари бу ҳарбий хизматчиларнинг ҳуқуқлари тўғрисидаги Женева конвенциясига зид эканини айтишган. Хусусан, уларнинг ҳақоратлар ёки омма эътиборидан ҳимояланиш ҳуқуқи бузилаётгани таъкидланган.