Ўзбекистоннинг йирик шаҳарларида чорраҳалар тўлиқ рақамли бошқарувга ўтказилади

Президент қарорига кўра, марказий шаҳарлардаги чорраҳалар тўлиқ рақамли бошқарув тизимига ўтказилади. Бу бўйича ҳокимликлар жавобгар деб белгиланди.

Фото: ИИБ ахборот хизмати

2023 йил охирига қадар Тошкент шаҳрининг барча чорраҳаларида, шунингдек, Нукус шаҳри ва вилоятлар марказларининг йирик асосий серқатнов чорраҳаларида, 2024 йил якунига қадар Нукус шаҳри ва вилоятлар марказларининг барча чорраҳаларида рақамли бошқарув тизими жорий қилинади.

Бу – президент Шавкат Мирзиёев томонидан 4 апрел куни имзоланган “Автомобиль йўлларида инсон хавфсизлигини ишончли таъминлаш ва ўлим ҳолатларини кескин камайтириш чора-тадбирлари тўғрисида”ги қарорда белгиланди.

Чорраҳаларни тўлиқ рақамли бошқарув тизимига ўтказиш бўйича шахсий масъулият Қорақалпоғистон Республикаси Вазирлар кенгаши раиси, Тошкент шаҳар ва вилоятлар ҳокимлари зиммасига юкланди.

Шаҳарларда йўл белгилари, кўрсаткичлари ва светофорларни ўрнатиш, йўл чизиқларини чизиш, пиёдалар ўтиш жойларини белгилаш орқали йўл ҳаракати воситаларини тартибга солишга ички ишлар органлари йўл ҳаракати хавфсизлиги бўлинмалари масъул деб белгиланди.

Транспорт ва пиёдалар оқими, пиёдалар билан боғлиқ содир этилган йўл-транспорт ҳодисаларининг таҳлили асосида туманлар ва шаҳарлардаги аҳоли гавжум ҳудудларда пиёдалар ўтиш жойларига пиёдалар бошқарадиган светофорларни 2023 йил якунига қадар ўрнатилиши назарда тутилмоқда.