“Кўз қўрқоқ, қўл ботир экан” — кўзи ожиз ҳолида 7-8 кишини иш билан таъминлаган тадбиркор

Ургутлик тадбиркор Феруз Баратов Kun.uz билан суҳбатда кўзи ожиз бўлиб қолган дастлабки йиллар, ўзгаларга қарамлик ва ёниб яшашга топилган иштиёқ ҳақида гапириб берди.

Феруз 2007 йилда аксарият тенгдошлари қатори Россияга ишлаш учун боради. Бир неча йил ишлаб, ота-онасига пул жўнатиб туради.

У 2012 йилларда бошида кучли оғриқ тургани, бурнидан қон келганини эслайди. “Кучли шамоллашнинг белгилари бор эди. Шундан сўнг бу ҳолат тез-тез такрорланиб турди. Очиғи, бошқа сабаб кўрсата олмайман, чунки ҳеч қандай зарба олмагандим, йиқилмагандим. Ўзимча даволаниб юрдим. 2015 йилда Ўзбекистонга бутунлай қайтиб келдим ва оила қурдим”, – дейди у.

Тўйдан бир муддат ўтиб, Феруз кўзи хиралаша бошлаганини сезади. Шифокорларга кўринади, чуқур текширувлардан ўтади. 2016 йилнинг январида Тошкентда операция ўтказилади.

“Операциядан чиққанимдан сўнг кўзим кўрмай қолди. Тасаввур қилинг, кўзингизни боғлаб қўйишса, қанча вақт тура оласиз. Нимани ҳис қиласиз? Асосийси биласизки, маълум вақтдан сўнг кўзингиздаги боғични ечиб юборишади ва сиз яна кўра бошлайсиз. Менда унақа бўлмади...” дейди Феруз.

Вақт ўтгани сари шифокорлар унга ўзлари билган ҳақиқатни сингдириб боришади. У бутунлай кўрмай қолади.

Бу орада фарзандлари дунёга келади.

“Уларни эркалардим. Мен гўдакликдаёқ кўзи ожиз бўлиб туғилганимда, балки синовим бошқачароқ бўлиши мумкин эди. Болаларимни кўролмаслигим жуда алам қиларди.

Ота-онам, укам кўчадан уйга кирар экан, фарзандларимга ширинлик олиб келарди. Шунда ўйладим, наҳотки мен уларга меҳнат қилиб, нимадир олиб келиш бахтидан маҳрумман? Бир умр меҳнат қилиб, нонини ўзи топиб юрган одам учун бу оғир синов экан. Фарзандларим учун нимадир қилишим керак, деган қарорга келдим. Тўғри, ҳозир яқинларимга малол келмаётгандирман, аммо болаларим келажаги учун ҳам ўзим ишлашим кераклиги ҳақида кўп ўйладим”, дейди қаҳрамонимиз.

Ургутда миллий ҳунармандчилик анча ривожланган. Феруз Баратов турмуш ўртоғи билан биргаликда кўрпа-кўрпача, ёстиқ тикишни йўлга қўяди.

Ферузнинг айтишича, аввал ҳеч қачон бу ҳунар билан шуғулланиб кўрмаган. Одам қилган ишни одам қиларкан, дейди у. Дастлаб аёли билан биргаликда буюртма асосида кўрпа-кўрпача тикиб беришган бўлса, кейинчалик ўзлари истиқомат қиладиган Чағизмон маҳалласидаги бир қанча хотин-қизларни иш билан таъминлайди.

Биз билан суҳбатда бўлган маҳалладаги бир қанча аёллар кўрпа-кўрпача тикишни “оилада фарзандлар тарбияси ва рўзғор юмушларига халал бермаган ҳолда даромад қилиш имконияти” деб таърифлашди.

“Ҳар битта қавиб берилган кўрпача учун 10-15 минг сўмдан оляпман. Бу иш ёш болали ва нафақадаги аёллар учун айниқса қулай. Нафақага чиққанингиздан кейин зерикиб қоларкансиз. Меҳнат қилиб, оилага қўшимча даромад келтиришга нима етсин. Ферузжон барака топсин, бирга ишлаётганимизга олти ойдан ошди. Келиним ҳам шу иш билан банд”, дейди Назокат Сатторова.

Ҳозирги вақтда маҳаллада етти-саккиз нафар хотин-қизлар Феруз бошлаган иш ортидан даромадга эга бўляпти. Кўрпа-кўрпачалар одатда буюртма асосида чойхона ва тўй маросимлари учун тайёрлаб берилмоқда.

“Яратганга шукур, яна меҳнат қила бошладим. Орзу қилганимдек, фарзандларим учун ота бўлиб нон топиб келдим. Уларни ёқтирган ширинликлари, ўйинчоқлари билан сийладим.

Кўз қўрқоқ, қўл ботир дейишади. Кўзларим кўрмаслиги фойдамга хизмат қила бошлади. Қўлим меҳнатдан қўрқмайди...” дейди Феруз.

У қайта-қайта шукрона келтириб, синовлардан олинган ижобий хулосасини айтиб ўтди.

“Мен ҳозир кўрман, демайман. Аввал кўр бўлган эканман. Сабаби оилани, ота-онани, яқинларни, саодатли кунларни қадрига кўпинча етмас эканмиз. Ҳамма нарса кўчада, ошна-оғайнигарчилик, ўйнаб-кулиш деб ўйларканмиз. Кўп вақтимиз мақсадсиз сарфланаркан. Демак, мен энди кўряпман, кўзим кўр бўлгач, асл кўзим очилди”, – деди Феруз Баратов.

Синовли дунё, дейишади. Баъзан савдолар кимнидир бутунлай синдириб ташласа, кимдир нажот ахтаради, умидини узмайди. Интилади ва яшашга куч, мақсад топа билади. Чиройли ва хайрли яшашни ўрганади. Феруз билан суҳбатлаша туриб, у худди шу йўлдан борганига амин бўлдик.

Исомиддин Пўлатов,
Kun.uz мухбири.

Тасвирчи ва монтаж устаси: Жаҳонгир Алибоев.