Наманганда ҳокимликлар юзга яқин тадбиркорнинг ишлаш вақтига чеклов ўрнатди

Чортоқ ва Мингбулоқ туман ҳокимликлари 95та овқатланиш корхоналари ва кўнгилочар объектлар иш вақтига 23:00гача чеклов ўрнатди. Бизнес омбудсман чеклов бекор қилинганини маълум қилиб, шундай ҳолатлар бўлса, бизнес-вакилга мурожаат қилишни сўради.

Чортоқ ва Мингбулоқ туманлари ҳокимликлари шу ҳудудларда жойлашган 95та умумий овқатланиш корхоналари ва кўнгилочар объектларнинг фаолиятига 23:00га қадар чеклов ўрнатди. Бундан норози тадбиркорлар бизнес омбудсманга мурожаат қилган. Бу ҳақда бизнес-вакил матбуот хизмати Кun.uz’га маълум қилди.

Айтилишича, ҳозирда ушбу чеклов бекор қилинган.

“Таъкидлаш лозимки, Ўзбекистон Республикаси Президентининг ПҚ-5113-сон қарорига мувофиқ, барча тадбиркорлик субъектларига жамоат хавфсизлиги қоидаларига қатъий риоя қилган ҳолда 24 соат мобайнида тун-у кун фаолият юритиш ҳуқуқи берилган.

Бизнес омбудсман томонидан Наманган вилояти ҳокимлигига тақдимнома киритилди. Натижада, Чортоқ ва Мингбулоқ туманларидаги тадбиркорлик субъектларининг фаолиятидаги чеклов бекор қилинди”, – дейилади расмий хабарда.

Шунингдек, бизнес омбудсман тадбиркорларга шундай ҳолатлар кузатилса, бизнес-вакилга мурожаат қилишни маълум қилган.