Эрининг жасадини таниган аёл, Харьковда ишлаётган сапёрлар ва ўт ўчирувчилар. Уруш суратлари

Урушнинг қирқ еттинчи кунида Путин билан музокара ўтказиш учун Москвага Австрия канцлери Карл Нехаммер ташриф буюрди, аммо Россия томони бу ташриф тафсилотларини очиқлмаяпти. Россиялик дипломатларнинг бир гуруҳи Хорватиядан чиқариб юборилди — биратўла 18 киши. Варшавада эса ҳукумат Россия ТИВга тегишли бўлган, аввалига советлар даврида, кейинчалик РФ дипломатлари фойдаланган ва «шпионлар уйи» номини олган бинони мусодара қилди — бу бино украиналик қочқинлар учун берилади. Украина ҳудуди россиялик ҳарбийлар томонидан ўққа тутилиши давом этмоқда.

Украинадаги уруш. Сўнгги маълумотлар

• «Азов» Мариупол кимёвий ҳужумга учрагани ҳақида хабар берди. Полк вакилининг сўзларига кўра, 11 апрель куни кечқурун россиялик ҳарбийлар шаҳар устига дрон орқали «номаълум турдаги заҳарли модда» ташлаган. «Азов»дагиларнинг тасдиқлашича, жабрланувчиларда «нафас етишмовчилиги, вестибул-атактик синдроми» кузатилмоқда. Жами уч киши жабрланган, уларнинг аҳволи қониқарли.
• 11 апрель куни ўзини ўзи мустақил деб эълон қилган ДХР халқ милицияси вакили Эдуард Басурин Россия телевидениесининг Биринчи канали эфирида чиқиш қилиб, Мариуполдаги «Азовсталь» заводида 3-4 минг миллатчи қолаётгани, уларни  «кимёвий қўшинлар»ни ишга солган ҳолда, «ҳайдаб чиқариш» имконияти борлигини айтганди.
• Буюк Британия Мариуполда кимёвий қурол қўллангани ҳақидаги хабарни текширмоқда. Украина ҳарбий стратегик коммуникациялар бошқармаси россиялик ҳарбийлар Мариуполда украиналик ҳарбийлар ва тинч аҳоли вакилларига қарши кимёвий қурол қўллангани ҳақида хабар берган. Бошқарма ҳозирча бу маълумотни тасдиқловчи қўшимча тафсилотларни келтирмаган.
• Қамалдаги Мариупол шаҳри мэри Вадим Бойченко «Ассошиэйтед пресс» ахборот агентлигига, уруш бошланганидан буён шаҳарда 10 мингдан ортиқ аҳоли ҳалок бўлганини хабар қилди. «Жасадлар кўчаларни гилам каби ёпмоқда», деган мэр интервьюда. Унинг ўзи айни вақтда шаҳарда эмас, у қаердалиги маълум қилинмаяпти, фақат Украина ҳудудида экани аниқ.
• Украина президенти Володимир Зеленский хизмат муддати тугаган ҳарбий хизматчиларни автоматик равишда демобилизация қилишни бекор қилди.
• Россия босқинининг олти ҳафтаси давомида украиналик болаларнинг қарийб учдан икки қисми ўз уйларини ташлаб кетишга мажбур бўлган. Бу ҳақда БМТ Хавфсизлик кенгаши йиғилишида ЮНИСЕФ раҳбари Мануэль Фонтен маълум қилди. Шу кунларда Украинада бўлиб қайтган Фонтеннинг маълум қилишича, Украинадаги 7,5 миллион боланинг 4,8 миллиони қочқинга айланган. У ташкилотдаги 31 йиллик фаолияти мобайнида бунга ўхшаш ҳолатга гувоҳ бўлмаганини қайд этиб ўтди.
• Украина вице-премьери Ирина Верешчукнинг маълум қилишича, душанба куни гуманитар йўлаклар орқали Украина шаҳарларида 4354 киши олиб чиқилди, шундан 556 нафари Мариуполдан. Мариуполдан гуманитар йўлак - Киев ва Москва ўртасидаги музокараларда Украина шарқидаги ҳудудлардан тинч аҳолини эвакуация қилиш бўйича келишилган тўққиз маршрутдан бири ҳисобланади.