БМТ: Украинадаги уруш Ер аҳолисининг бешдан бир қисмига очлик ва қашшоқлик хавфини туғдирмоқда

Россиянинг Украинага босқини 1,7 миллиард киши — сайёра аҳолисининг бешдан бир қисмига — қашшоқлик, етишмовчилик ва очлик олиб келиши мумкин. Бу ҳақда БМТ бош котиби Антониу Гутерриш огоҳлантирмоқда.

Украина ва Россия Федерацияси дунёда етиштириладиган буғдой ва арпанинг 30 фоизини, жўхорининг бешдан бир қисмини ва кунгабоқар ёғининг ярмидан кўпини таъминлайди. Шу билан бирга дунёнинг иқтисодиёти паст суръатларда ривожланаётган 45 мамлакати учун буғдой импортида Россия ва Украина улуши 30 фоиздан ортиқни ташкил этади.

Шунингдек, БМТнинг эслатишича, Россия дунёдаги энг йирик табиий газ экспортёри ва иккинчи энг йирик нефть экспортёри ҳисобланади.

Уруш ривожланаётган давлатларнинг пандемия, ташқи қарз ва инфляция ўсиши туфайли кучсизланган иқтисодиётидаги муаммоларни янада чуқурлаштирган.

2022 йил бошидан буён буғдой ва жўхори нархлари 30 фоизга ўсган, нефть нархи сўнгги бир йилда 60 фоиздан кўпроққа, табиий газ ва кўмир нархи эса икки баробар қимматлаган.

Гутерришнинг огоҳлантиришича, БМТ бундай вазиятда фавқулодда чоралар кўриш учун етарли маблағга эга эмас. Хусусан, БМТнинг озиқ-овқат дастури ҳам ресурслар етишмовчилиги ҳақида эълон қилган.

«Озиқ-овқат нархлари кўтарилиши билан ижтимоий ва сиёсий беқарорлик ўртасида тўғридан тўғри боғлиқлик бор. Бизнинг дунё бунга йўл қўя олмайди. Ҳозироқ ҳаракатга тушишимиз керак», — дея қайд этган Гутерриш.

• Аввалроқ АҚШ президенти Жо Байден ҳам Украинадаги уруш туфайли озиқ-овқат инқирози юзага келиши мумкинлиги, бу биринчи навбатда дунёнинг қашшоқ  мамлакатларига зарба бериши ҳақида гапирганди. Йирик халқаро ташкилотлар, жумладан ХВЖ, Жаҳон банки ва Жаҳон савдо ташкилоти зудлик билан очарчиликнинг олдини олишга қаратилган чоралар кўришга чақирганди.