Қарши шаҳар ҳокимлиги ва кадастрлар палатасининг 7 нафар мансабдор шахсларига жиноят иши қўзғатилди

Улар бозор қиймати 156,4 миллиард сўм бўлган 105 гектар ерни ноқонуний қарор билан бериб юборгани аниқланган.

Қашқадарё вилоят прокуратураси ахборот хизматининг хабар беришича, прокуратура томонидан Қарши шаҳар ҳокимлигининг ер ажратиш ҳақидаги қарорлари бўйича ўрганиш ишлари олиб борилган.

Ўрганишлар давомида Қарши шаҳар ҳокими амалдаги қонунларга зид равишда аукционсиз 318 та ҳолат бўйича бозор баҳоси 156,4 миллиард сўмлик 105 гектар ерга қарор чиқариб берган.

Ҳозирда ундан 90,1 миллиард сўмлик 58 гектар ер протест келтирилиб қарорлар бекор қилинган ва шаҳар ҳокимлиги захирасига қайтариб олинган. 1,2 гектар ер майдони аукционга чиқарилган. Қурилишлар амалга оширилган 56,4 миллиард сўмлик 27 гектар ер майдонларини қайтариш учун судларга 133 та даъво аризалари киритилган.

Юқоридаги жараёнларда қонунбузилиш ҳолатларига йўл қўйган Қарши шаҳар ҳокимлиги, кадастрлар палатаси қурилиш бўлимининг 7 нафар мансабдорларига Жиноят кодексининг тегишли моддалари билан айблов эълон қилиниб судга юборилган.