Россия АҚШни Украинага қурол етказиб бериш оқибатлари ҳақида огоҳлантирди - ОАВ

Москва Вашингтонга нота йўллаб, НАТОнинг Киевга қурол етказиб бериши вазиятни кескинлаштириши ва "олдиндан айтиб бўлмайдиган оқибатлар"га олиб келиши ҳақида огоҳлантирди, деб хабар берди Washington Post.

Газетада таъкидланишича, нота АҚШ Украинага 800 миллион долларлик ҳарбий ёрдам бериши тўғрисида эълон қилганидан сўнг жўнатилган.

Нота Россиянинг Вашингтондаги элчихонаси томонидан АҚШ давлат департаментига берилган, дейилади хабарда. 

"Биз АҚШ ва унинг иттифоқчиларини Украинага масъулиятсиз равишда минтақавий ва халқаро хавфсизлик учун олдиндан айтиб бўлмайдиган оқибатларга олиб келиши мумкин бўлган қурол етказилишини тўхтатишга чақирамиз", - дея ҳужжатдан иқтибос келтирган газета.

Давлат департаменти бу хабарга ҳозирча изоҳ бермади. 

Аввалроқ АҚШ президенти Жо Байден Вашингтон Украинага 800 миллион долларлик ҳарбий ёрдам ажратишини маълум қилганди. Пентагоннинг билдиришича, Украинага артиллерия, зирҳли транспорт ва вертолётлар етказиб берилади.