Медведчук Путин ва Зеленскийдан ўзини Мариупол аҳолисига алмашишларини сўради

Аввалроқ Медведчукнинг хотини уни британиялик асирларга алмашишни сўраганди.

Фото: Видеодан кадр

Украинадаги «Оппозиционная платформа — За жизнь» партияси сиёсий кенгаши раҳбари Виктор Медведчук ўзини «Мариупол ҳимоячилари ва аҳолиси»га алмашишларини сўради. Сиёсатчининг мурожаати Украина хавфсизлик хизмати YouTube-каналида эълон қилинди.

«Мен Россия Федерацияси президенти Владимир Путин ва Украина президенти Владимир Зеленскийга мени Мариупол ҳимоячилари ва ҳозирда у ерда бўлган ҳамда гуманитар йўлаклар орқали хавфсиз тарзда чиқа олмайдиган аҳолига алмашишларини сўрайман», — деди у.

РБКнинг хабарига кўра, шу билан бир вақтда «Россия 24» телеканали Украинада асирга олинган Буюк Британия фуқаролари Шон Пиннер ва Эйден Аслинни намойиш этган.

Улар Британия ҳукумати, хусусан, бош вазир Борис Жонсондан ўзларини Медведчукка алмаштиришда ёрдам сўраган.

Виктор Медведчук украиналик россияпараст сиёсатчи ҳисобланади. У Россия Украинада ҳарбий ҳаракат бошлагач, йўқолиб қолганди. 12 апрел куни Украина президенти Володимир Зеленский Медведчук қўлга олинганини айтиб, уни украиналик асирларга алмашишни таклиф қилди.

Медведчук қўлга олингач, унинг хотини Оксана Марченко ўзининг YouTube саҳифасида қатор давлат раҳбарлари, хусусан, Украина президенти Володимир Зеленский, Туркия президенти Ражаб Эрдўған, Британия бош вазири Борис Жонсон, Саудия валиаҳд шаҳзодаси Муҳаммад бин Салмон ва Россия президенти Владимир Путинга мурожаат қилди.

17 апрел куни Марченко эрини Россия армиясига асир тушган Шон Пиннер ва Эйден Аслинга алмашиш ҳақида гапирди.