1 октябрга қадар маҳаллий авиақатновларга мўлжалланган янги Silk Avia авиакомпанияси ташкил этилади

Ўзбекистонда 1 октябрга қадар маҳаллий авиақатновларга мўлжалланган янги Silk Avia авиакомпанияси ташкил этилади. Бу ҳақда президент матбуот котиби хабар берди.

Фото: Getty Images

Қайд этилишича, президент Шавкат Мирзиёев раислигида ўтказилган йиғилишда хорижий ва ички сайёҳларнинг авиақатновларга бўлган талабини қондириш бўйича қатор вазифалар белгилаб берилди.

Жумладан:

1 июлдан “Зиёрат туризми” дастури доирасида хорижий авиакомпанияларга кўрсатиладиган хизматларга 50 фоизгача чегирмалар жорий қилинади;
йил якунигача маҳаллий авиақатновлар сони ҳафтасига 48 тадан 60 тага, туташувчи қатновлар сони 4 тадан 6 тага етказилади;
1 октябрга қадар маҳаллий авиақатновларга мўлжалланган янги Silk Avia авиакомпанияси ташкил этилади;
авиаташиш харажатларини камайтириш мақсадида 9 та самолёт тўлиқ эконом-классга ўтказилади (бунда тарифлар 20 фоизга арзонлашади).

Туризм ва Транспорт вазирликларига бир ой муддатда туризм соҳасида транспорт инфратузилмасини яхшилаш концепциясини тақдимот қилиш бўйича кўрсатма берилди.