Россияда 9 йилга қамалган америкалик талаба 2010 йилдан буён АҚШ қамоғида сақланаётган россиялик учувчига алмашилди

Константин Ярошенко 2010 йилда АҚШ суди томонидан 20 йилга озодликдан маҳрум этилган, 2020 йилда Москванинг Головинский суди Тревор Ридни тўққиз йил умумий колонияда жазо ўташга ҳукм қилганди.

Тревор Рид ва Константин Ярошенко / Фото: AP/ТАСС

Россия ва АҚШ ўртасида россиялик учувчи Константин Ярошенкони америкалик талаба Тревор Ридга алмашув ўтказилди.

«Узоқ давом этган музокаралар жараёнидан сўнг 27 апрел куни илгари Россия Федерациясида ҳукм қилинган Тревор Рауди Ридни Россия фуқароси Константин Ярошенкога алмашув бўлиб ўтди», — дейилади Россия ташқи ишлар вазирлиги хабарида.

Ярошенко 2010 йилда АҚШ суди томонидан йирик партиядаги кокаинни ташишга тайёрланганликда айбланиб 20 йилга озодликдан маҳрум этилганди.

2020 йилда Москванинг Головинский суди полициячилар билан муштлашган Ридни тўққиз йил умумий колонияда жазо ўташга ҳукм қилганди.

Константин Ярошенко 2010 йил 28 майда Америка ҳукумати сўрови билан Либерияда қўлга олинган ва АҚШга депортация қилинган. У Венесуэладан АҚШга кокаин олиб ўтишга тайёргарлик кўрганликда айбланган. 2011 йил сентябрда суд Ярошенкони айбдор деб топган ва 20 йилга озодликдан маҳрум этган. Учувчининг ўзи айбига иқрор бўлмаган.

Ярошенко 2014 йилда Россия президенти Владимир Путинга мурожаат қилиб, ватанга қайтишда ёрдам беришини сўраган. Учувчи АҚШ ҳукумати уни қўлга олиш учун «ноқонуний операция» ўтказгани, уни қийнашгани, «ёлғон айблов» билан суд қилишганини айтган.

28 ёшли Тревор Рид 2019 йилда Москвада икки аёл билан жанжаллашаётганида ушланган. Рид қўлга олиш вақтида қаршилик кўрсатган. 2020 йил ёзида суд уни полицияга қарши зўравонлик қилгани учун тўққиз йиллик колония жазосига ҳукм қилган. Рид қўлга олинган вақтда маст бўлганини айтиб, айбини тан олмаган.

Байденнинг сўзларига кўра, 2021 йилда Женевада Путин билан учрашуви давомида 2020 йилда Россияда жосусликда айбланиб 16 йилга қамалган Пол Уиланни АҚШга қайтариш масаласи муҳокама қилинган. Россия президенти бу борада муросага келиш мумкинлигини айтган.

Москва 2008 йилда Бангкокда қўлга олиниб, АҚШга экстрадиция қилинган ва 25 йилга қамалган Виктор Бутни ҳам қайтаришга эришмоқчи. У колумбиялик жангариларга йирик партияда қурол сотиш учун тил бириктирганликда айбланган.