ДХШ асосида қуриладиган талабалар ётоқхоналари тўлови миқдори ҳақида маълумот берилди

Бугун, 12 май куни АОКАда давлат хусусий шериклик шартлари асосида талабалар турар жойлари қурилиши ва унга ажратилаётган субсидия маблағлари юзасидан ОТВ мутасаддилари иштирокида матбуот анжумани ташкил қилинди.

Фото: Олий ва ўрта махсус таълим вазирлиги

Тадбирда Олий ва ўрта махсус таълим вазири ўринбосари Сарвар Бузрукхонов Kun.uz мухбирининг ДХШ асосида қурилаётган талабалар турар жойларида тўлов масаласи қандай бўлиши борасидаги саволига ҳам жавоб қайтарди.

Унга кўра, ОТМ томонидан бугунги кунда талабадан қандай тартибда тўлов ундирилаётган бўлса, янги ётоқхоналарда ҳам ўша нарх сақланиб қолади.

“Нархда ўзгариш йўқ. Шунинг учун биз келишилган нарх деяпмиз. Талабаларга қўшимча юк тушмаслиги учун ҳам давлат бюджетидан етарли миқдорда субсидия бериляпти.

Ҳеч қайси меъёрлар талаба тўлаётган пул нархининг ошишига олиб келмайди” – деди Сарвархон Бузрукхонов.

Маълумот учун, Ўзбекистонда 2025 йилга қадар қўшимча яна 228 та талабалар турар жойлари қурилиши режалаштирилган.