Россияда чегара ҳудудида яна қурбон бор: Курск областига зарба оқибатида бир киши ҳалок бўлди

Регион раҳбари маълумотига кўра, ҳудуд эрта тонгда ўққа тутилган, маҳаллий спирт заводига бир неча зарба келиб тушган. Натижада корхонага хомашё келтирган юк машинаси ҳайдовчиси ҳалок бўлган.

«Рақиб бу объектга бир неча бор зарба берди. Яраланганлар ҳам бор. Уларга биринчи ёрдам кўрсатилди. Ҳозир посёлкада ёнғинни ўчириш ишлари олиб борилмоқда. Бир неча уй шикастланган. Портламай қолган снарядлар ҳам борлиги ҳақида хабар қилишмоқда», - дея ёзган Старовойт ўз телеграм-каналида.

Украина томони Теткино ўққа тутилгани бўйича расмий маълумот бермаган.

Бу Старовойт Теткино ва чегарадаги бошқа аҳоли пунктлари Украина томонидан ўққа тутилиши ҳақида илк бор хабар бериши эмас.

Қолаверса, бу Россия тинч аҳолиси орасидаги навбатдаги қурбондир - ўтган ҳафтада Белород областининг Солохи қишлоғида зарбалар оқибатида икки киши қурбон бўлганди. Украинада уруш бошланганидан буён чегара ҳудудлари раҳбарлари кўп марта турли қишлоқлар ўққа тутилгани ҳақида хабарлар беришган.

Теткино Украинанинг Суми области билан чегара яқинида жойлашган.

Бу регион маъмурияти раҳбари Дмитрий Живицкий чоршанба куни кечқурун Россия ҳудудидан туриб Украинанинг Теткинога яқин жойлашган Белополье шаҳри ҳудудига ўзиюрар артиллерия қурилмалари ва ўқотар қуроллардан зарбалар берилганини айтганди. Живицкийнинг сўзларига кўра, отишма «қарийб ярим соат вақт давом этган».

Живицкийнинг тасдиқлашича, шу куни кечқурун Россия томонидан Суми области билан чегаранинг бутун ҳудуди бўйлаб ўқ ёғдирилган.

БМТ маълумотларига кўра, Украинада уруш бошидан буён тинч аҳоли вакиллари бўлган 3,5 мингдан ошиқ киши ҳалок бўлган.