Самарқандда бешта уй ёниб кетди

Самарқанд туманида содир бўлган ёнғинда бешта хонадонда 490 метр квадрат том, шифт ва уй жиҳозлари ёниб кетган.

Фото: Самарқанд вилояти ФВБ

Самарқанд вилояти Фавқулодда вазиятлар бошқармаси ахборот хизматининг хабар беришича, бугун, 2022 йил 19 май куни соат 03:51 да Самарқанд тумани “Жойисой” МФЙ Бирдамлик кўчасида жойлашган хонадонларда ёнғин содир бўлаётгани тўғрисида туман ФВБга хабар келиб тушган.

Шундан сўнг ёнғинни ўчиришга 7 та ёнғин-қутқарув экипажи ва Камаз ёрдамчи машинаси жалб этилган. Улар воқеа жойига соат 04:06 да етиб борган ва соат 05:38 да ёнғин тўлиқ бартараф этилган.

Ёнғин оқибатида 5 та хонадоннинг тахминан 490 метр квадрат майдонда шифт ва том қисми ҳамда уй жиҳозлари ёниб, зарарланган. Ҳодиса оқибатида ҳеч ким ҳалок бўлмаган ва тан жароҳати олмаган.

Қайд этилишича, ҳозирда ҳодиса юзасидан терговга қадар текшириш ишлари олиб борилмоқда.

#ёнғин