Харков атрофида ҳарбий ҳаракатлар, «Азовстал»дан чиққан ярадор асирлар. Уруш суратлари

Киевда уч ойлик танаффусдан кейин АҚШ элчихонаси фаолияти тикланди. «Азовстал»дан чиқарилган украин ҳарбийлари Ростов областига олиб кетилган; 161.ru манбаси маълумотига кўра, улар орасида «Азов» полкига алоқадор бўлганлар судланади. Россия армияси Донбассда юриш қилишда давом этмоқда, артиллерия Славянск, Северодонецк ва Запорожьега зарбалар бермоқда. Шунингдек Россиянинг Курск области ҳам зарбага учраган.

АҚШ элчихонаси ходимлари Киевдаги элчихона ҳовлисида мамлакат байроғини юқори кўтармоқда. Элчихона феврал ойида Лвовга кўчирилганди
AP Photo/Efrem Lukatsky

Украинадаги уруш, сўнгги маълумотлар

Европа Украинага яна 9 млрд евро ва «Маршалл режаси» таклиф этмоқда. Еврокомиссия раҳбари Урсула фон дер Ляйен Украина айни вақтда олдинги чизиқда туриб европача қадриятларни муҳофаза қилаётгани, Европа эса уруш давомида ҳам, ундан кейин ҳам украинларни қўллаб-қувватлашда давом этишини айтган. Россия армияси босқини оқибатларини бартараф этиш учун ЕИга иттифоқчилар ҳам ёрдам бериши зарурлиги таъкидлаб ўтилган.
Украина армияси бош штаби украин ҳарбийлари Харков яқинидаги Дементеевка қишлоғини озод этишгани ҳақида хабар берди. Бу қишлоқ Харковдан шимолдаги трасса бўйида жойлашган, бу трасса чегарага ва ундан Белгородга олиб боради.
Россия вице-премьери Марат Хуснуллин Украина ерлари аннексияси истиқболлари ҳақида гапирди. У Украинанинг босиб олинган Мелитопол шаҳрида туриб барча эгалланган ҳудудларда (Хуснуллин уларни озод этилган ҳудудлар деб атади) Россия рубл айланмасини йўлга қўйишни режалаштиргани, Запорожье АЭС эса Россия учун ишлашини айтиб ўтди.
БМТ Инсон ҳуқуқлари бўйича Олий комиссари бошқармаси маълумотларига кўра, уруш бошидан буён Украинада тинч аҳоли вакилларидан 3778 киши ҳалок бўлган (сўнгги бир кунда қурбонлар сони 26 кишига ошган), 4186 киши яраланган (сўнгги бир кунда 124 киши).
Россия мудофаа вазирлиги сўнгги бир кунда «Азовстал»да яна 771 нафар украиналик ҳарбий асир тушганини хабар қилди. Вазирлик маълумотига кўра, душанба кунидан буён таслим бўлган украиналик ҳарбийлар сони 1730 нафарни ташкил этган, шундан 80 нафари ярадорлар. Украина томони биринчи куни 260 дан ошиқ, иккинчи куни 300 нафардан ошиқ ҳарбийлар завод ҳудудидан чиққани, уларнинг 100 дан ортиғи оғир ярадорлар экани ҳақида хабар берганди, учинчи куни қанча ҳарбий таслим бўлгани хабар қилинмади. Россиянинг Ростов областидаги нашрлар эса «Азов» полкининг асирга тушган жангчилари Донецкдан Ростов ва Таганрогдаги қамоқхоналарга олиб кетилгани ҳақида хабар тарқатди.

Қуйида 18 май куни Украинанинг турли ҳудудларидан олинган суратлар.

Донбасс шимоли