Германияда маймун чечаги касаллигини юқтирганлар учун карантин жорий этилди

Ушбу касалликка чалинганлар билан мулоқотда бўлганлар ҳам изоляцияга олиниши “қатъий” тавсия қилинмоқда.

Фото: Getty Images

Германия соғлиқни сақлаш вазири Карл Лаутербаҳ мамлакатда маймун чечаги касаллигини юқтирганлар учун карантин жорий этилганини эълон қилди.

"Бугундан Роберт Коҳ институти тавсияларини амалга татбиқ этдик - маймун чечаги касаллигини юқтирганлар камида 21 кун изоляция қилиниши лозим", - деди Лаутербаҳ.

Унинг сўзларига кўра, маймун чечаги касаллигига чалинганлар билан мулоқотда бўлганлар ҳам изоляцияга олиниши “қатъий тавсия қилинади”.

Одамларда маймун чечаги билан касалланиш ҳолатлари ҳозиргача асосан Африканинг баъзи қисмларида маълум бўлган. 20 май куни Германияда инфекциянинг биринчи ҳолати аниқланган. Бунгача Европада, жумладан, Буюк Британия, Португалия, Испания, Италия, Франция ва Белгияда бу юқумли касалликнинг бир неча ҳолати кузатилган эди.

Ҳозирги кунга қадар Европа ва Шимолий Америкада одамларда маймун чечаги инфекциясининг юздан ортиқ ҳолатлари қайд этилган.