Бангладешда кийим омборида кучли портлаш содир бўлди. 40 дан ортиқ киши ҳалок бўлиб, юзлаб кишилар яраланди

Юзлаб ўт ўчирувчилар ёнғинни ўчиришга киришганида портлаш рўй берган. Ёнғин сабаблари ҳозирча номаълум, аммо расмийларнинг тахмин қилишича, айрим контейнерларда ёнувчан химикатлар сақланган бўлиши мумкин.

Маҳаллий шифохоналар яраланганлар билан тўлиб-тошган, ҳукумат кўнгиллиларни қон топширишга чақирмоқда. Жабрланувчиларнинг бир қисми ҳарбий ҳоспиталларга ётқизилган.

Кўплаб яраланганлар оғир аҳволда қолмоқда ва тиббиёт ходимлари қурбонлар сони ортиши мумкинлигидан огоҳлантирмоқда.

Якшанба куни кўнгиллилар омборхонанинг ёнғин давом этаётган ҳудудларидан жасадларни олиб чиқишда давом этишган. Портлаш оқибатида камида беш нафар ўт ўчирувчи жароҳат олган. Бедарак йўқолганлар қаторида воқеа жойига етиб келган бир қанча журналист ҳам бор.

Портлаш шу қадар кучли бўлганки, унинг овози бир неча километр узоқликдан ҳам эшитилган, яқин атрофдаги биноларнинг ойналари тўкилиб тушган. Маҳаллий дўкондорлардан бирининг журналистларга айтишича, омбордан отилиб чиққан парча ярим километрдан ортиқ масофага учиб, унинг ҳовузига қулаган. Унинг сўзларига кўра, портлашдан кейин «олов ёмғири» кузатилган.

Ёнғин ҳудудида контейнерларнинг металл синчлари ва омборхонанинг қулаб тушган томи бўлаклари қолган.

Ўт ўчирувчилар оловга қарши курашни якшанба куни ҳам давом эттиришган, уларнинг ишини қийинлаштирувчи кичик портлашлар ҳам давом этган. «Биз ҳозирга қадар у ерда қолган ёнувчан кимёвий моддалар туфайли ёнғинни тўла назоратга ололмадик», деган Бангладеш ўт ўчириш хизмати раҳбари Маин Уддин.

Ғарбга экспорт қилиш учун мўлжалланган кийимлар

Хавфли кимёвий моддалар денгизга сизиб чиқишининг олдини олиш учун армия жалб этилган.

Ёнғин вақтида Ситакунда омборида 4 минг контейнер сақланган. Бу омбор контейнерларни Бангладешнинг иккинчи йирик порт шаҳри Читтагонгга олиб кетишда юк ташиш пункти вазифасини ўтайди.

Маҳаллий расмийларнинг сўзларига кўра, контейнерларда миллион долларларга баҳоланадиган либослар бўлган, улар Ғарб мамлакатларига экспорт қилиш учун мўлжалланганди. Сўнгги йилларда Бангладеш дунёда кийим-кечак экспорти бўйича иккинчи ўринга чиққан.

Шу билан бирга, мамлакатда хавфсизлик техникаси қоидаларига кўп ҳолларда эътиборсизлик билан қаралади, натижада тўқимачилик фабрикаларида йирик ёнғинлар рўй бериб туради.

Dhaka Tribune газетаси маълумотига кўра, 2005 йилдан буён мамлакатда ишлаб чиқариш ҳудудларида рўй  берган 12 та йирик фалокатли ҳодисалар (ёнғинлар, бинолар қулаши ва хавфли моддалар сизиб чиқиши) оқибатида мингдан ортиқ киши ҳалок бўлган.