Ўзбекистонда қовуннинг фақат иссиқхонада етиштириладиган «Зарҳал» нави яратилди

Қишлоқ хўжалиги вазирлиги томонидан эълон қилинган хабарда айтилишича, «Зарҳал» номи берилган ушбу дурагай фақат иссиқхонада етиштирилади.

Билдирилишича, «Зарҳал»ни ўта эртапишар қовун тоифасига киритиш мумкин. У 72-78 кун давомида ўсади, палаги бақувват, сершох. Барги кенг, қалин, тўқ яшил рангли, қирқимлидир.

Қайд этилишича, қовуннинг ҳосили шарсимон, ўртача катталикда бўлиб, оғирлиги атиги 0,8-1,5 килограмм келади. Юзаси эса текис, сариқ рангда. Устида яшил рангли чизиқлар тортилган. Ички қисми оқиш, хушбўй ҳидли.

«Зарҳал»нинг таркибидаги қуруқ модда миқдори 13,5-14,5 фоизни ташкил этса, қанд миқдори 12-13 фоиздан иборат.

Ҳосилдорлиги 8-8,5 кг/м2 га тенг бўлган ушбу қовун нави ун шудринг ва фузариоз сўлиш касаллигига чидамли экани айтилади.