Кудрин: Россия халқаро ташкилотлардан чиқмаслиги керак 

Россия халқаро ташкилотларга аъзоликни тўхтатиб қўйгани ёки ўзига нисбатан маълум бир муносабат туфайли норозилиги сабабли уларни тарк этмаслиги керак. Бундай фикрни Россия Ҳисоб палатаси раиси Алексей Кудрин билдирди. У 17 июнь, жума куни 25-Петербург халқаро иқтисодий форумида нутқ сўзлади.

Кудриннинг сўзларига кўра, Москва бундай ташкилотлар, шунингдек, конвенциялар «ҳам ўзаро савдони, ҳам фуқаролар алмашинувини, транспортни ва бошқа масалаларни» тартибга солишини ҳисобга олиши керак. Бу форматлар Россия учун жаҳон бозори шароитида ишлай олиши учун зарур, дея қўшимча қилди эксперт.

«Шундай қилиб, бир кун келиб биз машинамизда чегарага борганимизда, у ерда автомобил бошқа мамлакатларнинг экологик талабларига жавоб бермаслиги борасида эътирозлар келиб чиқмаса бўлди... Бизни ташқарига чиқаришмайди, ҳеч бўлмаганда шу ерда ўзгартиришимиз керак», – деди у мажозий оҳангда.

11 июнь куни Россия президенти Владимир Путин инсон ҳуқуқлари бўйича Европа судининг 2022 йил 15 мартдан кейин чиқарилган ҳукмларини ижро этмаслик тўғрисидаги қонунни имзолади.

Ҳисоб палатаси раҳбари, шунингдек, Россия ҳукуматига келгуси уч йил учун янги иқтисодиётнинг ўрта муддатли стратегиясини шакллантиришга яна икки-уч ой керак бўлишини қўшимча қилди.

Алексей Кудрин инқирозга қарши тезкор чора-тадбирларни «жуда адекват» деб баҳолади - «бизда хоҳлаганча ресурслар мавжуд эмас, бизнеснинг эса сўровлари кўп»лигини ҳисобга олган ҳолда. 

«Биз ҳали ҳам технологиялар ишлаб чиқаряпмиз, лекин бутун дунё линиясини ишлаб чиқара олмаймиз», деди Кудрин ва 2022 йилда Россия импорти «30 фоизга» қисқаришини, аммо «нолга тенг бўлмаслиги»ни қўшимча қилди. 

Шу билан бирга, эксперт Россия бозорини тарк этган хорижий компанияларни давлат корпорациялари эмас, балки хусусий тадбиркорлар сотиб олиши зарурлигига ишончи комил. Мисол тариқасида, мутахассис «Макдоналдс» ресторанларини сотиб олиш бўйича келишувни келтирди, деб таъкидлайди РБК агентлиги. Кузбасслик тадбиркор Александр Говор уларнинг янги эгасига айланди. У аввалроқ Американинг McDonald’s Corporation компанияси унга Россиядаги бизнесини «рамзий пулга»га сотганини айтган эди. 

12 июнь, якшанба куни Москва ва Москва областида «Вкусно – и точка» янги бренди остида 15 та ресторан очилди. 13 июнда яна 50 та, июнь охирига бориб эса 200 га яқин филиаллар очилиши керак, деди тармоқ бош директори Олег Пароев. Унинг таъкидлашича, яқин 5-6 йил ичида тармоқ 850 та филиалдан мингтагача кенгайиши мумкин.