Тўқаев Россия таклиф этган орденни рад этди - ОАВ

Сиёсатшунос Ербол Едиловнинг ёзишича, Россия томони Қосим-Жўмарт Тўқаевга Александр Невский ордени билан мукофотлашни таклиф қилган. Тўқаев бу таклифни рад этган.

Фото: Akorda.kz

Қозоғистон президенти Қосим-Жўмарт Тўқаев президентлик ваколати якунланмагунича миллий ва хорижий мукофотларни олмасликка қарор қилди, деб хабар берди Tengrinews.kz.

Сиёсатшунос Ербол Едиловнинг ёзишича, Россия томони Қосим-Жўмарт Тўқаевга Александр Невский ордени билан мукофотлашни таклиф қилган.

"Давлат раҳбари ушбу эътироф учун миннатдорлик билдирди. Аммо у президентлик ваколати якунланмагунича миллий ва хорижий мукофотларни олмасликка қарор қилган. Шу сабабли президент Бишкекка ташрифи чоғида биринчи даражали "Манас" орденини олишни рад этган", - деб ёзган у.

Хабар берилишича, Тўқаевнинг матбуот котиби Руслан Желдибай ушбу маълумотни тасдиқлаган.

Аввалроқ Қосим-Жўмарт Тўқаев Петербург иқтисодий форумидаги чиқишида унинг мамлакати ўзини ўзи мустақил деб эълон қилган Донецк ва Луганск халқ республикаларини тан олмаслигини айтганди.