Кременчугга ҳужум оқибатлари, янги зарбаларга тайёрланаётган Киев. Уруш суратлари

28 июн куни БМТ Хавфсизлик кенгаши Кременчугдаги «Амстор» савдо маркази ўққа тутилишини муҳокама қилиш учун шошилинч йиғилиш чақирди - бу ҳужум оқибатида камида 20 киши ҳалок бўлган. Йиғилишда Украина президенти Володимир Зеленский чиқиш қилиб, Россияни терроризмга ҳомийлик қилувчи давлат сифатида тан олишга чақирди. Худди шу вақтда Туркия НАТО саммитида Швеция ва Финландиянинг альянсга аъзо бўлишини қўллаб-қувватлади, Болгария эса 70 нафар россиялик дипломатлар чиқариб юборилишини эълон қилди. АҚШ Россияга қарши янги санкциялар жорий этди. Бу чекловлар яна 57 киши (жумладан Тина Канделаки) ва 100 дан ортиқ компанияни (жумладан «Камаз») қамраб олади. 

Қуйида 28 июн куни Украинанинг турли ҳудудларида олинган суратлар.

Одесса

Одесса яқинида украин армиясининг дала лагери. Россия босқини бошланганидан буён шаҳарнинг ўзида ва унинг атрофидаги ҳудудларда ҳарбий ҳаракатлар олиб борилмаган, аммо ҳудуд доимий равишда ракета зарбаларига учрамоқда. 

«Амстор» савдо марказидаги супермаркетнинг ёниб кетган токчалари, 27 июн куни бу ерга россияликларнинг Х-22 қанотли ракетаси келиб тушди. Россия томони баёнотида акси айтилаётганига қарамай, ҳужум вақтида савдо маркази ишлаб турган ва одамлар гавжум бўлган. Камида 20 киши ҳалок бўлди, яна 40 нафарга яқин киши бедарак йўқолган.

Харкив 

Киев 

Гетман Петро Сагайдачно шарафига ўрнатилган ҳайкал снаряд парчаларидан ҳимоялаш учун қум тўлдирилган қоплар билан ўраб қўйилган. Бир неча ҳафталик танаффусдан кейин Киев яна Россия томонидан ўққа тутила бошлади. 26 июн куни кўп қаватли уйлардан бирига ракета келиб тушиши оқибатида бир киши ҳалок бўлиб, олти киши яраланганди.