Украина Европа иттифоқига электр энергияси экспортини бошлади

Украинадан электр энергияси Руминияга етказиб берилмоқда, деди президент Володимир Зеленский. Унинг сўзларига кўра, гап нафақат Украина учун экспорт даромади, балки бутун Европа хавфсизлигини таъминлаш ҳақида кетмоқда.

Фото: Getty Images

Украина Европа иттифоқига электр энергиясининг «катта экспорти»ни бошлади. Бу ҳақда Украина президенти Володимир Зеленский 30 июнь, пайшанба куни Telegram’да эълон қилган видеомурожаатида айтиб ўтди.

«Бугун Европа иттифоқи билан яқинлашувимизда яна бир муҳим қадам бўлди», — деди Зеленский. У Руминияга электр энергияси етказиб берилаётганини қўшимча қилди. «Бу фақат биринчи босқич, биз етказиб беришни кенгайтиришга тайёргарлик кўрмоқдамиз», дея қўшимча қилди Зеленский.

Украина раҳбарининг таъкидлашича, гап Украина учун нафақат экспорт даромади, балки бутун Европа хавфсизлигини таъминлаш ҳақида кетмоқда. Сиёсатчи Киев уруш бошланганидан кейин Европа энергетика тизимига қўшилганини эслатди.

16 мартдан бошлаб Украина ва Молдова континентал Европа энергетика тизимининг бир қисмидир. Синов синхронизацияси уч ой олдин Европа электр узатиш тизими операторлари тармоғи (ENTSO-E) томонидан эълон қилинган.

Украина ва Европа энергия тизимларининг яқинлашуви 2017 йилда бошланган. Украина тармоқлари ва электр станцияларини ривожлантиришга қарийб 700 миллион евро сармоя киритилди. Дастлаб, жараённи якунлаш 2023 йилгача режалаштирилган эди, аммо якунда Украина энергия тизимларини Россия ва Беларусдан узиш жорий йилнинг февраль ойида амалга оширилди.