“5 июл куни Қорақалпоғистонда ҳеч қандай митинг ўтказилмади, комендантлик соати қоидаларини бузганлар кузатилмади” - Миллий гвардия расмийси

Миллий гвардия полковниги Ҳамиджон Дадабоевнинг маълум қилишича, Нукусда ва Қорақалпоғистоннинг бошқа ҳудудларида бўлиб ўтган ноқонуний намойишларда хориж фуқаролари ҳам иштирок этган. Лекин уларнинг аниқ сони, шахсига оид маълумотлар тергов сири бўлиб, суриштирувлар якунига кўра қўшимча маълумот тақдим этилади.

Шу билан бирга, Қозоғистон билан чегара бу мамлакат фуқаролари чиқиб кетишлари учун очиқлиги, қўшни давлат фуқароларининг Қорақалпоғистондаги тартибсизликларда иштирок этганига оид маълумотлар бўлмаса, улар бемалол давлат чегараларидан ўтиб кетишлари мумкинлиги билдирилди.

Тадбирда қатнашган Kun.uz мухбирининг “5 июл куни Қорақалпоғистонда митинглар ўтказилиши режалаштирилганди, ана шу митинглар ўтказилдими? Шунингдек, комендантлик соати қоидаларини бузганларга оид статистик маълумотлар борми?” деган саволларига Миллий гвардия расмийси шундай жавоб берди:

– 5 июл куни Қорақалпоғистон ҳудудида ҳеч қандай митинг ўтказилмади. Ҳудуд аҳолиси барча масалалар моҳиятини англаган ҳолда бундай тадбирларда иштирок этмади, ноқонуний намойишлар кузатилмади. Комендантлик соати қоидаларини бузганларга келсак, белгиланган вақтда кўчага чиққанлар суриштирилганда улар асосан зарурат туфайли, масалан, дорихонага ёки тиббий ёрдам излаб чиққани ёки чекловлардан бехабарлиги маълум бўлди. Комендантлик соати қоидаларини қасддан бузганлар қайд этилмади. Нукус шаҳрида ва умуман, Қорақалпоғистон ҳудудида осойишталик ҳукм сурмоқда.