Германия Канададан «Шимолий оқим» газ қувури турбинасини қайтаришни сўради

Германия иқтисодиёт вазири Роберт Ҳабек Канада ҳукуматидан бу мамлакатда таъмирланаётган Россиянинг «Шимолий оқим» газ қувури агрегатларини қайтаришни сўради. 

«ЕИнинг янада кескин санкциялари учун биринчилардан бўлиб курашишга тайёрман, аммо кучли санкциялар бизнинг иқтисодиётимизга эмас, Россия ва Путинга кўпроқ зарар етказиши керак», — деди Ҳабек.

Унинг сўзларига кўра, қиш мавсуми олдидан газ омборларини тўлдириш учун «Шимолий оқим» ишлаши лозим.

«Германиянинг тўлдирилган газ омборлари нафақат немис бозори, балки Европа бозори учун ҳам муҳим», — деб таъкидлади Ҳабек.

У Канада ҳукуматига «оғир кайфиятда» мурожаат қилаётганини айтди.

«Газпром» июн ўрталарида Siemens компанияси газ агрегатларини таъмирлашдан қайтармаганини билдириб, «Шимолий оқим» қувури орқали газ етказиб бериш ҳажмини 60 фоизга қисқартирди. 11-21 июл кунлари эса режадаги таъмирлаш ишлари сабабли «Шимолий оқим» орқали газ етказиш буткул тўхтатилади. 

Аввалроқ Siemens Канаданинг санкциялари сабабли газ турбиналарини «Газпром»га қайтара олмаслигини маълум қилганди.