Ўзбекистонлик ҳожиларнинг илк гуруҳи 14 июл куни ортга қайтади

“Ҳаж – 2022” дастури доирасида ўзбекистонлик зиёратчилар шу йил 14 июл–4 август кунлари юртимизга қайтиб келади. Бу ҳақда Ўзбекистон мусулмонлари идораси хабар берди.

Ўзбекистонга қайтувчи зиёратчилар ўз парвозларини Жидда шаҳридан Ўзбекистоннинг 7 та ҳудуди – Тошкент, Наманган, Самарқанд, Бухоро, Қарши, Урганч ва Нукусда жойлашган халқаро аэропортларга амалга оширади.

Қайд этилишича, унда жами 12 мингдан зиёд йўловчи ташиш режа қилинган.

“Ҳаж – 2022” тадбирининг узлуксиз ва тартибли ўтказилишида “Uzbekistan Airways” акциядорлик жамиятидан жами 70 га яқин малакали учувчи ва 260 га яқин борткузатувчиси жалб этилган.

Ушбу йўналишдаги авиақатновлар Boeing-767 ҳаво кемаларида амалга оширилади. Зиёратчиларга ҳаво саҳнида турли таом ва ичимликлар таклиф этилади.