Қашқадарёда қамчиланган аёлни эри эмас, у билан ишқий муносабатда бўлиб келаётган йигитнинг яқинлари дўппослагани маълум бўлди

Қашқадарё вилоятининг Яккабоғ туманида 38 ёшли аёл бир нечта эркак томонидан калтакланиб, сочи кесиб ташлангани хабар берилганди. «Замон» информацион дастурида маълум қилинишича, аёлни эри эмас, у билан бирга 4 йилдан буён яшаб келаётган йигитнинг отаси ва ака-укалари қамчилаган.

Маълум бўлишича, 38 ёшли боши очиқ аёл ўзидан 10 ёш кичик йигит билан ишқий муносабатда бўлиб келган. Бу ҳолат ўғлини уйлантирмоқчи бўлган ота-она ва йигитнинг бошқа яқинларига маъқул келмаган. Аёлга қилинган насиҳат эътиборсиз қолдирилган.

Аёл қамчиланган куни йигитнинг қистови билан унинг унаштирилган қизига қўнғироқ қилган. Суҳбат давомида у ўзини йигитнинг хотини деб таништирган. Бундан хабар топган йигитнинг отаси ва ака-укалари аёлни жазолашга аҳд қилишган.

Шундан сўнг аёл йигитнинг яқинлари томонидан у яшаётган хонадонга олиб борилган ва ўша ерда «самосуд» қилинган. Аёлни йигитнинг отаси қамчилаган.

Йигитнинг отаси ва яна уч нафар ака-укаси аёлнинг қўл-оёқларини боғлаб, сочларини олиб ташлашган. Сўнг уни тонггача дўппослаб, қамчилашган. Мазаси қочиб қолган аёл эрталаб касалхонага олиб борилган.

Шифокорларнинг ташхисига кўра, аёлнинг танасидаги юмшоқ тўқималарига жароҳат етказилган. Унда ёпиқ бош мия шикасти, бош мия чайқалиши, бошнинг иккала чакка тепа соҳалари юмшоқ тўқималари лат ейиши ва шилингани кузатилган.

Мазкур ҳодиса юзасидан Яккабоғ тумани ИИБ ҳузуридаги тергов бўлинмаси томонидан Жиноят кодексининг 138-моддаси 2-қисми «а» (жисмоний азоб бериб, зўрлик ишлатиб, ғайриқонуний равишда озодликдан маҳрум қилиш) банди билан жиноят иши қўзғатилган.

Жиноят иши бўйича аёлни қамчилаган тўрт нафар эркак гумон қилинувчи тариқасида жалб қилиниб, Жиноят процессуал кодексининг 221-моддаси тартибида ушланган. Ҳозирда жиноят иши бўйича тергов ҳаракатлари олиб борилмоқда.